काठमाडौँ — चितवन-३ बाट सोबिता गौतम ५९ हजार २७७ मत प्राप्त गर्दै निर्वाचित भएकी हुन् । शनिबार सकिएको मतगणनामा सोबिताले उक्त मत प्राप्त गरेकी हुन् । सोबिताले निकटतम प्रतिस्पर्धी नेपाली कम्युनिस्ट पार्टीकी उम्मेदवार रेनु दाहाललाई ३८ हजार ६ सय ६२ मतान्तरले पराजित गरेकी हुन् । 

सोबिताले ५९ हजार मत कटाउँदा रेनुले भने २० हजार ६ सय १५ मत मात्र प्राप्त गरिन् । चितवन-३ मा कांग्रेसका टेकप्रसाद गुरुङले ८ हजार ३ सय ४४ र एमालेका शंकर थपलियाले ५ हजार ४ मत पाए । 

सोबिता २०७९ को प्रतिनिधिसभा चुनावमा काठमाडौं- २ बाट सांसद बनेकी थिइन् । उक्त निर्वाचनमा १५ हजार २२९ मत प्राप्त गर्दै निर्वाचित भएकी थिइन् । यसपटक भने उनी चुनाव लड्न चितवन-३ पुगेकी हुन् । यहाँ नेकपाबाट पूर्वप्रधानमन्त्री पुष्पकमल दाहालकी छोरीसमेत रहेकी रेनु दाहाल उम्मेदवार थिइन् । रेनु भरतपुर महानगरपालिकाको मेयरबाट राजीनामा दिएर प्रतिनिधिसभा उम्मेदवार बनेकी थिइन् ।