बारा — कांग्रेस सभापति गगन थापाले यस चुनावबाट कांग्रेसको बहुमतको सरकार बनेमा शक्तिशाली सम्पत्ति छानबिन आयोग बनाएर सबैभन्दा पहिला शेरबहादुर देउवाको सम्पत्ति र दोस्रोमा आफ्नो व्यक्तिगत सम्पत्ति छानबिन गरिने बताएका छन्।

बाराको निर्वाचन क्षेत्र नम्बर १ को कोल्हवीमा आयोजित चुनावी सभामा उनले यस्तो बताएका हुन्।

‘२०४८ पछिका सबै ठूला पदमा रहेका व्यक्तिहरूको सम्पत्ति छानबिन हुने छ र यसको सुरुवात आफ्नै पार्टीबाट गरिने छ,’ उनले भने, ‘म पनि मन्त्री भइसकेको हुँ, त्यसैले मेरो पनि हुनुपर्छ।’

२०७४ पछि सबैको ध्यान विकासमा केन्द्रित हुनुपर्थ्यो, नभएर जेनजी आन्दोलन र ०८४ मा हुनुपर्ने चुनाव अहिले भइरहेको उनले बताए।

‘जेन-जी आन्दोलनअघि सबै ठूला दलको चासो सरकार गिराउने, टिकाउने र प्रधानमन्त्री बन्नेतिर गएकोले जेन-जी आन्दोलन भएको हो,’ उनले भने, ‘जेनजी आन्दोलनलाई षडयन्त्र भन्नु अतिवादी सोच हो। आन्दोलनपछि पनि तिनीहरूलाई दोष दिनु अतिवादी सोच हो। आन्दोलनपछि घिउ थप्ने, उत्तेजना थप्ने यी कार्य भए।’