प्रवक्ता नारायणप्रसाद भट्टराईका अनुसार केन्द्रीय आचारसंहिता अनुगमन समितिमा इमेल, व्यक्तिगत दर्ता तथा सञ्चारमाध्यमबाट जानकारी लिइएका समेत २५४ उजुरीमध्ये ८८ वटा उजुरीमा स्पष्टीकरण सोधिएकोमा ५७ वटाको जवाफ प्राप्त भएको छ ।
What you should know
काठमाडौँ — निर्वाचन आयोगले निर्वाचन आचारसंहिता उल्लंघन गरेको आरोपमा ८८ वटा स्पष्टीकरण सोधेको छ । आयोगले यसरी सोधेको स्पष्टीकरणमध्ये ५७ वटामा जवाफ प्राप्त भएको निर्वाचन आयोगले जनाएको छ ।
प्रवक्ता नारायणप्रसाद भट्टराईका अनुसार केन्द्रीय आचारसंहिता अनुगमन समितिमा इमेल, व्यक्तिगत दर्ता तथा सञ्चारमाध्यमबाट जानकारी लिइएका समेत २५४ उजुरीमध्ये ८८ वटा उजुरीमा स्पष्टीकरण सोधिएकोमा ५७ वटाको जवाफ प्राप्त भएको छ । आयोगबाट ४ वटा राजनीतिक दललाई स्पष्टीकरण सोधेको छ । ३३ जना उम्मेदवारलाई स्पष्टिकरण सोधेको छ । त्यसबाहेक सरकारी / शैक्षिक व्यक्तिलाई ५१ वटा स्पष्टीकरण सोधिएको निर्वाचन आयोगले जनाएको छ । प्रदेशगत रुपमा कोशी प्रदेशमा ८, बागमती प्रदेशमा ४०, गण्डकी प्रदेशमा ६, लुम्बिनी प्रदेशमा ७, कर्णाली प्रदेशमा ४ र सुदूरपश्चिम प्रदेशमा ४ वटा रहेका निर्वाचन आयोगले जनाएको छ ।
निर्वाचन आयोगले स्पष्टिकरणपछिको जवाफपछि केही उम्मेदवारहरुलाई जरिवाना गरेको छ । आयोगले निर्वाचन आचारसंहिताविपरीत काम गरेको भन्दै नेपाली कम्युनिस्ट पार्टीका जाजरकोट निर्वाचन क्षेत्र नम्बर १ उम्मेदवार शक्तिबहादुर बस्नेतलाई निर्वाचन आयोग ऐन, २०७३ को दफा २३ अनुसार २५ हजार रुपैयाँ जरिवाना गर्ने निर्णय गरेको छ । उनले निर्वाचन प्रचारप्रसारका क्रममा पैसा वितरण गरेको उजुरी परेको थियो ।
त्यस्तै, रुपन्देही निर्वाचन क्षेत्र नम्बर २ मा नेपाल जनसेवा पार्टीका उम्मेदवार डा. कमल भुसाल (निकोलस भुसाल) जेन-जीको जुत्ता अनुमतिबिना प्रयोग गरेको अभियोगमा २५ हजार जरिवाना गरेको छ । हर्क साम्पाङको नेतृत्वमा रहेको श्रम संस्कृति पार्टीलाई पनि आचारसंहिता उल्लंघन गरेको आरोपमा २५ हजार जरिवाना गरेको छ । स्वपाका बााकेका उम्मेदबार खगेन्द्र सुनार, भक्तपुर २ को नेपाल जनसेवा पार्टीकी उम्मेदवार जानुका पाठक (शोभा) लाई सचेत गराएको छ ।
जिल्ला आचारसंहिता अनुमगन समिति र अनुगमन अधिकृतसमक्ष कुल १ हजार ७६ वटा उजुरी परेका थिए । तीमध्ये १ हजार ६१ वटा (९९%) फर्छ्यौट भएको आयोगले जनाएको छ ।
प्रदेशगत रुपमा हेर्दा सबैभन्दा धेरै लुम्बिनी प्रदेशमा २४४ वटा उजुरी परेका छन् भने सबैभन्दा कम सुदूरपश्चिम प्रदेशमा ९६ उजुरी परेका छन् । प्राप्त उजुरीमध्ये ९७ वटा (९%) लिखित र ९७९ ओटा (९१%) टेलिफोन, एसएमएसलगायत स्रोतबाट प्राप्त भएका थिए । प्राप्त उजुरीमध्ये सबैभन्दा धेरै तोकिएको आकारभन्दा ठूला तुल ब्यानर र झन्डा प्रयोग गरेको, सामाजिक सञ्जालको दुरुपयोग गरेको, डिजे माइक बजाएर ध्वनि प्रदूषण गरेको, शिक्षक तथा कर्मचारीहरू र स्थानीय जनप्रतिनिधिहरू प्रचारप्रसारमा हिँडेको, सार्वजनिक स्थान र सवारीसाधनमा झन्डा टाँगेको, अनुमति नलिएका सवारी साधन प्रयोग गरेको लगायतका छन् ।
