संगठनात्मक प्राथमिकता निर्धारण रणनैतिक व्यवस्थापनलगायतका कारण सभा स्थगित गरिएको दाबी
What you should know
बुटवल — राष्ट्रिय स्वतन्त्र पार्टी (रास्वपा)ले शनिबार रूपन्देहीको भैरहवामा गर्ने भनेको चुनावी सभा अचानक स्थगित गरेको छ । तर, दाङमा शुक्रबारको भेला भने जारी छ ।
रास्वपाले बिहीबार पत्रकार सम्मेलन गर्दै शनिबार भैरहवाको अञ्चलपुरमा रहेको प्रदर्शनी स्थलमा गरिने परिवर्तन उद्घोष सभामा साविकको लुम्बिनी अञ्चलको ६ जिल्लाका नेता कार्यकर्तासहित १ लाख जनाको उपस्थिती रहने जनाएको थियो । भेलामा रास्वपा सभापति रवि लामिछाने, वरिष्ठ नेता बालेन्द्र शाह र ६ वटै जिल्लाका रास्वपाका ऊमेदवारले सम्बोधन गर्ने कार्यक्रमको तयारी थियो ।
शुत्रबार केन्द्रीय समितिका उपसभापति डोलप्रसाद अर्यालले परिवर्तन उद्घोष कार्यक्रम स्थगित गरिएको जानकारी गराएको रास्वाप केन्द्रीय संगठन विभाग सदस्य गोपाल घिमिरेले बताए । केन्द्रबाट पठाइएको पत्रमा ‘संगठनात्मक प्राथमिकता निर्धारण तथा रणनैतिक व्यवस्थापनलगायतका विशेष कारण ऊक्त कार्यत्रम हालका लागि स्थगित गर्ने निर्णय गरिएको’ उल्लेख छ । ‘सम्भवत भैरहवामा कुनै ठूला सभा हुँदैनन्,’ घिमिरेले भने, ‘अब स्थानीय स्तरबाटै चुनावी सभा र घरदैलो अभियानमै केन्द्रीत हुन्छौं ।’
रास्वपाको शुक्रबार दाङमा चुनावी सभा जारी छ । त्यसमा सहभागी हुन बिहीबार सुर्खेतबाट सभापति लामिछाने र वरिष्ठ नेता शाह आउने कार्यक्रम थियो । दुवै नेताको स्वागतका लागि बसेका रास्वपा कार्यकर्ताले बिहीबार राति दाङमा एमालेको चुनाव चिन्ह अंकित झण्डा जलाएका थिए । एमालेले त्यसको केन्द्रदेखि जिल्लासम्म कडा प्रतिवाद गरिरहेको छ । त्यसको असर रूपन्देही सभामा देखिनसक्ने जोखिम भएकाले केन्द्रदेखि नै सभा स्थगितको निर्णय भएको स्थानीय एक नेताले बताए ।
रास्वपाले लुम्बिनी प्रदेशको दाङको सभालाई शुक्रबार सम्बोधन गरेर रास्वपाका सभापति लामिछाने र वरिष्ठ नेता शाह भैरहवाको सभालाई सम्बोधन गर्न आइपुग्ने तालिका बनाएको थियो । तर, वरिष्ठ नेता शाह अस्वस्थ भएको भन्दै बिहीबार सुर्खेतको सभाबाटै काठमाडौं फर्किएका छन् ।
५ निर्वाचन क्षेत्र रहेको रूपन्देहीका ३ निर्वाचन क्षेत्रमा वरिष्ठ नेता शाहनिकट उम्मेदवार छन् । त्यसैले यसअघि पनि शाह र लामिछाने दुवै जनाले यस क्षेत्रमा ग्रामीण क्षेत्रको भ्रमण गरेका थिए । दुवै नेताले आफ्ना उमेदवार बिजयी गराउने आन्तरिक प्रयाससँगै सामूहिक सन्देश दिनका लागि पनि भैरहवामा सभा आयोजना गरिएको भए पनि अन्तिम समयमा अस्वभाविक तरिकाले सभा स्थगित गरिएको रास्वपाले जनाएको छ ।
