काठमाडौँ — कांग्रेस सभापति गगन थापाले भदौ २३ र २४ मा भएको जेन-जी आन्दोलनका घटनालाई अस्वीकार गर्ने र त्यसको लाभ खाने प्रवृत्ति नेपाली राजनीतिमा देखिएको बताएका छन् ।

भदौ २३ र २४ का घटना केही होइन भनेर अस्वीकार गर्ने र त्यसको लाभ लिन खोज्ने दुवै प्रवृतिलाई कांग्रेसले अस्वीकार गर्ने सभापति थापाको भनाइ थियो । 

काठमाडौंमा बिहीबार चुनावी प्रतिज्ञापत्र सार्वजनिक र प्रश्नोत्तर कार्यक्रमलाई सम्बोधन गर्दै सभापति थापाले भदौ २३ र २४ को घटनाको सम्बन्धमा पार्टीका धारणा राखेका हुन् । 'भाद्र २३ र २४ गते दुईदिन उथलपुथलकारी दिनहरू भए । थुप्रै नौजवानहरू माथिए । म ती नौजवानहरूलाई सम्झन चाहन्छु । ती नौजवानहरूप्रति हार्दिक श्रदाञ्जली व्यक्त गर्छु ।' 

'भाद्र २३ र २४ को घटनाका सन्दर्भमा दुईवटा अप्रोच हामी देख्छौं । एउटा, डिनायलको अप्रोच अर्थात् केही पनि भएको होइन वा त्यो बेलामा जे थियो ठिक थियो त्यो बेलामा ती घटनाहरू जे कारणले गर्दा भए ती आवश्यक थिएनन् । सडकमा जो नौजवान आए ती आउन आवश्यक थिएन । अथवा सबै ठिकठाक थियो । एउटा यसलाई अस्वीकार गर्ने अप्रोच देख्छौं,' थापाले भने, 'अर्को पनि एउटा अप्रोच छ, त्यो भनेको डिभिडेन्ट खाने अप्रोच । सडकमा नौजवानहरू आए, आफ्नो आक्रोश व्यक्त गरे र आफ्नो राजनीतिक स्वार्थको रोटी सेक्ने बेला यही हो, त्यसको लाभ मैले लिनुपर्छ, त्यसको लाभ मैले उठाउनुपर्छ, यो डिभिडेन्ट खानेहरूको प्रवृति । कांग्रेस यो दुवै प्रवृतिलाई अस्वीकार गर्छ । हामीले डिभिडेन्ट लिनु पनि हुन्न, हामीले अस्वीकार गर्नु पनि हुन्न ।'