काठमाडौँ — कांग्रेस सभापति गगन थापाले नागरिकको स्वास्थ्य उपचार राज्यको दायित्व भएको बताउँदै यसलाई निशुल्क बनाउने बताएका छन्। घोषणापत्र सार्वजनिक कार्यक्रममा बोल्दै उनले भने, ‘हरेक नागरिक स्वास्थ्य बीमामा जोडिएर आफ्नो र परिवारको उपचार खर्चबारे निश्चिन्त रहोस्। हरेक नागरिकले उपचारमा जतिसुकै खर्च लागोस्, राज्य छ भन्ने गर्व गरून् र ढुक्कसँग भन्न सकून्—गोजीमा बीमा कार्ड छ, मलाई केको डर छ।’

सभापति थापाले स्वास्थ्य बीमालाई राष्ट्रिय गौरवको कार्यक्रम बनाउने पनि बताए। उनले कमाउनेले प्रिमियम तिर्ने र नहुनेको खर्च राज्यले बेहोर्ने बताए। नागरिकको स्वास्थ्य उपचार राज्यको जिम्मेवारी भएको भन्दै यसबारे घोषणापत्रमा स्पष्ट उल्लेख गरिएको छ। उनले भने, ‘यसका लागि हामीले स्वास्थ्यमा १५ बुँदे प्रतिज्ञा गरेका छौं।’

उहाँले गुणस्तरीय स्वास्थ्य सेवा निःशुल्क प्राप्त गर्नु नागरिकको संविधान प्रदत्त हक भएको भन्दै स्वास्थ्य बीमाको लागत सरकारले नै बेहोर्नुपर्ने बताए। हाल जारी स्वास्थ्य बीमामा देखा परेको संकट हटाउने योजना पनि आफूहरूसँग रहेको उनले बताए। साथै, नेपालमा फ्रि हेल्थकेयरको अवधारणा सम्भव भएको र यो आफूहरूको संकल्प भएको दाबी गरे।