काठमाडौँ — एमाले अध्यक्ष केपी शर्मा ओलीले देश भत्काउने र बनाउनेबीचको द्वन्द्वमा परेको र देशलाई फेरि प्रयोगशाला बनाउन खोजिएको बताएका छन्।

काठमाडौंमा आयोजित घोषणापत्र सार्वजनिक कार्यक्रममा बोल्दै ओलीले यस्तो बताएका हुन्। उनले भदौ २३ र २४ को विध्वंसपछि अनिश्चयको बादल मडारिएको बताउँदै ती दिन सम्पूर्ण व्यवस्थामाथि धावा बोलिएको बताए। उनले भने, 'यतिबेला देश यस्तो दोबाटोमा उभिएको छ। एकातिर रीस, आवेग र आक्रोश छ, अर्कोतिर विवेक र जिम्मेवारी छ।' उनले भत्काउने र बनाउनेबीचको द्वन्द्वमा देशलाई फेरि प्रयोगशाला बनाउन खोजिएको पनि बताए।

अध्यक्ष ओलीले यतिबेला आफूसँग केही प्रश्नहरू रहेको भन्दै ती प्रश्नहरू सार्वजनिक गरे। उनले भदौ २३ र २४ का घटनाहरू स्वतःस्फूर्त थिए कि योजनाबद्ध भनेर प्रश्न उठाए। उनले जेन–जी प्रदर्शनकारीहरूको हुँदै नभएको माग भन्दै संसद् विघटन किन गरिएको थियो भन्ने प्रश्न पनि गरे। उनले यस्ता प्रश्नहरूको जवाफ खोजिनुपर्ने बताए।