बुटवल — प्रतिनिधिसभाका उम्मेदवारलाई कारबाही गरेको प्रगतिशील लोकतान्त्रिक पार्टीको रुपन्देहीमा विवाद देखिएको छ । पार्टीले आफ्नै उम्मेदवारलाई कारबाही गरेपछि प्रलोपाले रूपन्देही क्षेत्र नं. ३ मा नेकपा एमालेलाई सघाउने निर्णय बुधबार सार्वजनिक गरेको थियो । 

प्रलोपाका केन्द्रीय सदस्य वामदेव क्षेत्री, बिमला विक र केन्द्रीय सदस्य एवं क्षेत्रीय इन्चार्ज रविना भण्डारीले विज्ञप्ति जारी गर्दै पार्टीका उम्मेदवार गोविन्द काराखेती अनुशासनको कारबाहीमा परेपछि प्रलोपाले रूपन्देही क्षेत्र नं. ३ मा एमालेका उम्मेदवार वासुदेव घिमिरेलाई सघाउने निर्णय भएको बुधबार सार्वजनिक गरेका थिए । विज्ञप्तिमा केन्द्रीय सदस्यद्वय विक र भण्डारीले हस्ताक्षर गरेका छन् भने अर्का केन्द्रीय सदस्यले दुई पार्टीबीच भएको सहमति पत्र एमालेका उमेदवार वासुदेव घिमिरेलाई दिएका थिए । 

तर, प्रलोपाका रूपन्देही इन्चार्ज पंकज राईले भने बुधबार नै विज्ञप्ति जारी गर्दै प्रलोपाले केन्द्रीय सदस्यहरूले गरेको निर्णय जिल्लाले नमान्ने जनाएको हो । उनले जारी गरेको विज्ञप्तिमा लुम्बिनी प्रदेश अध्यक्ष परिषदको सदस्य यज्ञ पोखरेल र केन्द्रीय सदस्य वामदेव क्षेत्रीले जिल्लासँग समन्वय नगरी एकलौटी रूपमा पार्टीको समानुपातिक उमेदवार विमला विक र रविना भण्डारीलाई केन्द्र र प्रदेशसँग सल्लाह गरेर एमाले उमेदवारलाई समर्थन गर्ने निर्णय भएको भन्ने भ्रममा राखेर पार्टीको पत्रमा हस्ताक्षर गराएको दाबी गरेका छन् ।

विकले जारी गरेको विज्ञप्तिमा जिल्ला संयोजक कृष्ण बञ्जाडेको नाम उल्लेख भए पनि हस्ताक्षर छैन । रूपन्देही–३ मा पार्टीको प्रत्यक्षतर्फको उमेदवार नभएपछि कसलाई समर्थन गर्ने भन्ने विषयमा अहिले बैठक बसिरहेको र त्यसको निर्णय नै आधिकारीक हुने इन्चार्ज राईले बताए ।