काठमाडौँ — प्रधानमन्त्री सुशीला कार्कीसँग भेटेर एमाले अध्यक्ष केपी शर्मा ओलीले २३ र २४ भदौमा भएका घटनाको छानबिन गर्न गठित जाँचबुझ आयोगको काम र प्रतिवेदनको अवस्थाबारे चासो राखेका छन् ।

प्रधानमन्त्री कार्कीसँग भएको वार्तामा तत्कालीन प्रधानमन्त्री ओलीले आयोगको प्रतिवेदन ‘चुनाव र आफना लागि प्रतिकूल हुने गरी नआओस्’ भन्ने आसयले जिज्ञासा राखेका थिए । 

‘जाँचबुझ आयोगको प्रतिवेदनमा के हुँदै छ ? आयोगले काम गरिरहेको छ नि ?’ ओलीले राखेको जिज्ञासा उद्धृत गर्दै प्रधानमन्त्री कार्यालयका एक अधिकारीले कान्तिपुरसंग भने । प्रधानमन्त्री कार्कीले आयोगले आफ्नो काम गरिरहेको जवाफ दिएकी थिइन् ।

जेन–जी आन्दोलनका क्रममा प्रहरीको गोली लागेर २३ भदौमा १९ युवाको मृत्यु हुँदा ओली प्रधानमन्त्री थिए । २४ भदौको दिउसो भने उनले राजीनामा दिएका थिए । निर्वाचनअघि आयोगको प्रतिवेदन सार्वजनिक भएमा त्यसको असर आफूलाई पर्ने ओलीको बुझाइ छ । 

त्यसैगरी ओलीले निर्वाचनको सुरक्षासँगै ढुक्क भएर मतदान गर्न पाउने कुराको सुनिश्चितता, उम्मेदवारको सुरक्षाप्रति चासो राखेको पनि स्वकीय सचिव श्रेष्ठले बताए । उनले प्रधानमन्त्रीलाई एकै चरणमा २१ फागुनमै निर्वाचन सम्पन्न गर्न सुझाव दिएका थिए । नागरिकका साथै मतदानस्थलदेखि सबै प्रक्रियाको सुरक्षा हुनुपर्नेमा जोड दिँदै धाँधली हुन सक्नेतर्फ पनि ध्यानाकर्षण गराएको प्रधानमन्त्रीको सचिवालयले जनाएको छ । 

प्रधानमन्त्री कार्कीले निर्वाचनको सुरक्षाका लागि सरकार तयारी अवस्थामा रहेको भन्दै नेपाली सेनासमेत परिचालन भएकाले ढुक्क भएर प्रचारमा लाग्न र निर्वाचन सफल बनाउन दलहरूको भूमिका प्रभावकारी हुने बताएकी थिइन् । सरकारले निर्वाचन क्षेत्र तथा मतदान केन्द्रसमेतलाई लक्षित गरी एकीकृत सुरक्षा योजना बनाएर सेना, सशस्त्र र नेपाल प्रहरी परिचालन गरेकाले सुरक्षाको कुनै कमी नहुने प्रधानमन्त्री कार्कीको भनाइ थियो ।

निर्वाचनका लागि बुधबारदेखि नै ८० हजार सेना खटिइसकेकाले सुरक्षामा कुनै कमीकमजोरी नहुने भएकाले ढुक्क भएर निर्वाचनमा लाग्न कार्कीले दलहरूलाई आग्रह गरेकी थिइन् ।

उनले आफू २१ फागुनको निर्वाचन सफल गरेर नयाँ सरकारलाई जिम्मेवारी हस्तान्तरण गर्न आतुर रहेको बताएकी थिइन् । उनले आफू स्वतन्त्र, निष्पक्ष र भयरहित रूपमा निर्वाचन सम्पन्न गराउन दृढ रहेको कुरा पनि दोहोर्‍याएकी थिइन् ।

ओलीका स्वकीय सचिव राजेश वज्राचार्यले पनि प्रधानमन्त्री कार्कीसँग निर्वाचनसँग केन्द्रित भई छलफल भएको बताए । २३ र २४ भदौको जेन–जी आन्दोलनपछि ओली सत्ताबाट बर्हिगमन भएका थिए भने नागरिक सरकारका रूपमा पूर्वप्रधानन्यायाधीश कार्की प्रधानमन्त्री नियुक्त भएकी थिइन् । ओलीले यसअघि कार्की सरकारलाई ‘हा हुको सरकार’ भन्दै स्विकार्न नसकिने टिप्पणी गर्दै आएका थिए ।

तर एमाले अध्यक्ष ओलीले निर्वाचनको प्रचारका लागि घरदैलोमा झापा जानुअघि प्रधानमन्त्रीसँग बिहीबार गरेको भेट अर्थपूर्ण देखिएको छ । जाँचबुझ आयोग तथा राष्ट्रिय मानवअधिकार आयोग प्रतिवेदन लेखनतिर लागेको समयमा प्रधानमन्त्रीसँग भएको ओलीको भेटलाई महत्त्वका साथ हेरिएको छ ।

बालुवाटारबाट बर्हिगमन भएको करिब ४ महिनापछि २४ पुसमा पनि ओली आफैंले समय लिएर प्रधानमन्त्री कार्कीलाई भेट्न बालुवाटार पुगेका थिए । झन्डै तीन घण्टासम्म चलेको उक्त भेटवार्तापछि नै ओली कार्की सरकारप्रति केही नरम देखिन थालेका हुन् । त्यसको करिब एक महिनापछि बिहीबार ओलीले दोस्रो पटक प्रधानमन्त्री कार्कीसँग भेट गरेका हुन् । केही दिनअघि ओलीले सरकार नै आफू र एमालेलाई निर्वाचनमा पराजित गर्ने षड्यन्त्रमा लागेको आरोप लगाएका थिए ।

सरकारले झापामा सुरक्षा नेतृत्वसमेत परिवर्तन गरेपछि ओली रिसाएका थिए । बिहीबारको भेटवार्तामा एमाले नेता विष्णु रिमाल पनि उपस्थित थिए ।

यसैबीच, प्रधानमन्त्री कार्कीले प्रतिनिधिसभाको आसन्न निर्वाचन देशभर २१ फागुनमा एकै चरणमा हुने बताएकी छन् । ‘एकै चरणमा निर्वाचन हुन्छ, यसमा ढुक्क हुनुहोस्’ कार्कीले भनिन्, ‘बाक्लो हिमपात भए के गर्ने भन्ने बारेमा त्यसबेला नै निर्णय हुनेछ ।’