पाल्पा — आगामी फागुन २१ गते हुने प्रतिनिधिसभा सदस्य निर्वाचनका लागि पाल्पाको दुई निर्वाचन क्षेत्रमा राजनैतिक दल र स्वतन्त्र गरी ३० जनाले उम्मेदवारी मनोनयन गरेका छन् । 

प्रतिनिधिसभा क्षेत्र नम्बर १ मा ९ राजनीतिक दल र ४ स्वतन्त्र गरी १३ जनाको उम्मेदवारी परेको निर्वाचन अधिकृत दशरथ पंगेनीले बताए  ।  त्यस्तै, क्षेत्र नम्बर २ मा १४ राजनीतिक दल र ३ स्वतन्त्र गरी १७ जनाको उम्मेदवारी परेको सहायक निर्वाचन अधिकृत केशव पराजुलीले जानकारी दिए ।

पाल्पा क्षेत्र नम्बर १ मा नेपाली कांग्रेसका तर्फबाट सन्दीप राना र क्षेत्र नम्बर २ बाट हिमालदत्त श्रेष्ठले उम्मेदवार दर्ता गराएका छन् । त्यस्तै नेकपा एमाले क्षेत्र नम्बर १ बाट नारायण प्रसाद आचार्य र क्षेत्र नम्बर २ बाट ठाकुर प्रसाद गैरेले मनोनयन दर्ता गरेका छन् ।

नेपाली कम्युनिष्ट पार्टीबाट पाल्पामा क्षेत्र नम्बर १ बाट हुमबहादुर सुनारी र क्षेत्र नम्बर २ बाट सोमप्रसाद पाण्डेयले मनोनयन दर्ता गरेका छन् । राष्ट्रिय स्वतन्त्र पार्टीबाट पाल्पा क्षेत्र नम्बर १ बाट  र क्षेत्र नम्बर २ बाट माधव बहादुर थापाले उम्मेदवारी दर्ता गराएका छन् । पाल्पामा राप्रपाबाट क्षेत्र नम्बर १ बाट बृहस्पति अर्याल र क्षेत्र नम्बर २ बाट डुलबहादुर कुंवरले मनोनयन दर्ता गराएका छन् । 

राष्ट्रिय जनमोर्चाले क्षेत्र नम्बर १ बाट नरमति सिंजाली र क्षेत्र नम्बर २ बाट बालबहादुर दर्लामी (विशाल) ले मनोनयन दर्ता गराए ।

पाल्पा क्षेत्र नम्बर १ बाट नेशनल रिपब्लिक नेपालबाट थमन सिं रेश्मी मगर, मंगोल नेशनल अर्गनाइजेशनबाट सलन चिदी मगर, नेपाल कम्युनिष्ट पार्टी (माओवादी) बाट पुरन गैहृे शर्माले मनोनयन दर्ता गरेका छन् । क्षेत्र नम्बर १ बाट कोशल अर्याल, डिल्लीराज काफ्ले, बुद्धबहादुर विरकट्टा र बाछा दली मिया स्वतन्त्र रुपमा मनोनयन दर्ता गरेका छन् ।