दाङ — प्रतिनिधिसभा सदस्यका लागि दाङ क्षेत्र नम्बर १ मा पूर्वमन्त्री, पूर्व प्रदेश मुख्यमन्त्री र सांसदहरू प्रमुख प्रतिस्पर्धी बनेका छन् ।

कांग्रेसबाट सहमहामन्त्री योगेन्द्र चौधरीले उम्मेदवारी दर्ता गरेका छन् । चौधरी विजयकुमार गच्छदार नेतृत्वको तत्कालीन मधेशी जनअधिकार फोरम लोकतान्त्रिकबाट समानुपातिकतर्फ संविधानसभा सदस्य भएका थिए । कांग्रेस प्रवेशपछि शेरबहादुर देउवानिकट रहेका चौधरी पछिल्लो समय गगन थापा नेतृत्वको विशेष महाधिवेशनमा सहभागी भई सहमहामन्त्री बनेका हुन् ।

एमालेबाट लेखा आयोगका सदस्य रेवतीरमण शर्माले उम्मेदवारी दर्ता गरेका छन् । शर्मा २०७४ मा दाङ क्षेत्र नम्बर १ (२) बाट १९ हजार ३ सय ५४ मतका साथ लुम्बिनी प्रदेशसभा सदस्य निर्वाचित भएका थिए । उनी २०५९ देखि २०६२ सालसम्म एमालेको जिल्ला सचिव थिए ।

नेपाली कम्युनिष्ट पार्टीबाट मेटमणी चौधरीले उम्मेदवारी दर्ता गरेका छन् । २०७९ को निर्वाचनमा चौधरी कांग्रेस, माओवादी केन्द्रसहितको गठबन्धनबाट उम्मेदवार भई २६ हजार ५ सय ७६ मत प्राप्त गरी विजयी भएका थिए । २०७४ मा पनि उनी तत्कालीन एमालेबाट यही क्षेत्रमा ३७ हजार ९ सय ८ मत प्राप्त गरी निर्वाचित भएका थिए । एमाले फुटेपछि उनी माधवकुमार नेपाल नेतृत्वको नेकपा (एकीकृत समाजवादी) मा गई सहरी विकास मन्त्री भएका थिए ।