पोखरा — उज्यालो नेपाल पार्टीका केन्द्रीय सदस्य एवं ऊर्जा विज्ञ कुशल गुरुङले आगामी प्रतिनिधि सभा निर्वाचनका लागि कास्की निर्वाचन क्षेत्र नम्बर २ बाट उम्मेदवारी दर्ता गराएका छन् । मंगलबार पोखरास्थित मुख्य निर्वाचन अधिकृतको कार्यालय पुगेर गुरुङले आफ्नो मनोनयन पत्र दर्ता गराएका हुन् ।

लामो समयदेखि नेपालको ऊर्जा संकट समाधान र वातावरण संरक्षणको क्षेत्रमा क्रियाशील गुरुङले यसपल्टको निर्वाचनमा मुलुकको आर्थिक समृद्धि र सुशासनलाई आफ्नो प्रमुख चुनावी मुद्दा बनाएका छन् । उम्मेदवारी दर्ता गरेपछि सञ्चारकर्मीहरूसँग कुरा गर्दै उनले देशलाई लोडसेडिङको अँध्यारोबाट मुक्त गर्न प्राविधिक रूपमा आफूले योगदान दिएको स्मरण गर्दै अब नीति निर्माण तहमा पुगेर देशलाई आर्थिक रूपमा पनि 'उज्यालो' बनाउन चाहेको बताए ।

परम्परागत राजनीतिक दल र नेताहरूबाट जनता आजित भइसकेको भन्दै उनले कास्कीका मतदाताले यसपल्ट भिजन भएको र क्षमतावान् उम्मेदवारलाई रोज्ने विश्वास व्यक्त गरे । उनले पोखराको पर्यटन प्रवर्द्धन, हरित ऊर्जाको विकास र युवाहरूका लागि स्थानीय स्तरमै रोजगारी सिर्जना गर्ने विषयलाई आफ्नो प्राथमिकतामा राखेका छन् ।

राजनीतिक रूपमा चर्चामा रहने कास्की निर्वाचन क्षेत्र नम्बर २ एमालेका रश्मि आचार्य, कांग्रेसका माधवप्रसाद बास्तोला 'मधु', नेकपाका हेमबहादुर थापा, रास्वपाका उत्तमप्रसाद पौडेल लगायत विभिन्न राजनीतिक दलका उम्मेदवारह चुनावी मैदानमा छन् । यद्यपि, ऊर्जा र वातावरणका क्षेत्रमा विज्ञता हासिल गरेका गुरुङको उम्मेदवारीले यहाँको प्रतिस्पर्धालाई थप रोचक बनाउने देखिएको छ । उनले विशेषगरी युवा पुस्ता र तटस्थ मतदाताहरूलाई आकर्षित गर्ने रणनीति लिएका छन् । आफू विज्ञको हैसियतले संसद्मा पुगेर नेपालको परम्परागत विकास मोडललाई परिवर्तन गर्न लागिपर्ने उनले प्रतिबद्धता व्यक्त गरेका छन् ।