अछाम — अछामको चुनावी राजनीति फेरि एकपटक नाटकीय मोडमा पुगेको छ । अन्तिम समयमा नेकपा एमालेले अछाम–१ बाट आफ्नै उम्मेदवारलाई पछि हटाएर नवघोषित प्रगतिशील लोकतान्त्रिक पार्टीका सुदूरपश्चिम अध्यक्ष दीपक साउदलाई सूर्य चिह्नबाट उम्मेदवार बनाउने निर्णय गरेसँगै यहाँको चुनावी सरगर्मी थप रोचक बनेको छ ।

शनिबार साँझ मात्र एमालेले केन्द्रीय सदस्य झपट बोहरालाई उम्मेदवार बनाएको थियो ।  तर केही घण्टामै त्यो निर्णय उल्टियो । अन्ततः बोहराको टिकट काटियो र तत्कालीन माओवादी केन्द्रका प्रभावशाली नेता दीपक साउद एमालेको उम्मेदवार बने । तत्कालीन विद्रोही माओवादीको आधार इलाका मानिदै आएको अछामको रामारोशनका साउदसँग भएको जनाधारको गणितीय हिसाब गरेर उनलाई टिकट दिइएको चर्चा हुन थालेको छ । 

२०७९ को प्रतिनिधिसभा निर्वाचनमा अछाम–१ बाट एमालेले भीम रावलको नाम एकल सिफारिस गर्दा पनि एमाले अध्यक्ष ओलीले उनै बोहरालाई अन्तिम समयमा उम्मेदवार बनाएका थिए । तर अहिले भने अन्तिम समयमा बोहरालाई दिइएको टिकट साउदलाई थमाइएको छ । तत्कालीन माओवादीका केन्द्रीय सदस्यसमेत रहेका साउद अछामका पुराना नेतामध्येका एक हुन् ।