काठमाडौँ — कांग्रेसका निवर्तमान कार्यवाहक सभापति पूर्णबहादुर खड्काले रुख चुनाव चिह्नबाहेक अन्यथा सोच्न नसकिने बताएका छन् । विशेष महाधिवेशनबाट पार्टी सभापतिमा गगन थापा निर्वाचित बनेपछि पूर्वसभापति शेरबहादुर देउवा पक्षको नेतृत्व गर्दै निर्वाचन आयोगदेखि सर्वोच्च अदालतसम्म पुगेका खड्काले रुख चुनाव चिह्नबाहेक अन्यथा सोच्न नसकिने बताएका हुन् । 

सामाजिक सञ्जालमा आइतबार साँझ खड्काले लेखेका छन्, 'रुख चुनाव चिह्नबाहेक अन्यथा सोच्न र कल्पना पनि गर्न म सक्दिनँ । नयाँ पार्टी खोल्छन्, स्वतन्त्र उम्मेदवारको रूपमा उठ्छन् जस्ता बजारमा आएका गलत हल्लाहरूको पछि नलाग्न पार्टीका सबै साथीहरू, शुभेच्छुकहरू र हाम्रा आम आदरणीय मतदाताहरूमा हार्दिक अनुरोध र अपिल गर्दछु ।'

निर्वाचन आयोगले कांग्रेसको सभापति गगन थापा रहेको विवरण अद्यावधिक गरेको थियो । त्यसकाविरुद्धमा खड्काको नेतृत्वमा कांग्रेस सर्वोच्च अदालत पुगेको छ । यस विषयमा उनले लेखेका छन्, 'निर्वाचन आयोगको निर्णयका विरुद्धमा पार्टीको आधिकारिकताको वैधानिक दाबी र कानुनी उपचारको लागि २०८२ माघ ३ गते पार्टी केन्द्रीय कार्यालय सानेपामा बसेको केन्द्रीय कार्यसमितिको बैठकको  सर्वसम्मत निर्णय अनुसार सबैको तर्फबाट न्याय पाउने विश्वासका साथ आज हामी सर्वोच्च अदालत गएका हौं ।'