गुल्मी — गुल्मीमा नेकपा एमालेले दुवै निर्वाचन क्षेत्रमा पुरानै अनुहार दोहोर्‍याएको छ । केन्द्रीय राजनीतिमा हेभिवेट नेताका रुपमा परिचित प्रदीप ज्ञवाली र गोकर्ण विष्ट नेकपा एमालेबाट चुनावी मैदानमा उत्रिएका छन् ।

निवर्तमान उपमहासचिव हाल केन्द्रीय सदस्य ज्ञवाली एमालेका प्रभावशाली नेता हुन् । उनी गुल्मी-१ बाट गत निर्वाचनमा कांग्रेस नेता डा. चन्द्र भण्डारीसँग पराजित भएका थिए । ज्ञवालीले ३२ हजार १५२ मत प्राप्त गर्दा भण्डारीले ३३ हजार ७४४ मत लिएर चुनाव जितेका थिए । यसपटक यस क्षेत्रमा एक लाख २२ हजार १ सय ८६ जना मतदाता रहेका छन् । ज्ञवालीसँग भिड्ने अन्य प्रतिस्पर्धीको भने अझै टुङ्गो छैन ।

उपाध्यक्ष गोकर्ण विष्ट पनि नेकपा एमालेका प्रभावशाली नेता हुन् । गुल्मी-२ बाट गत निर्वाचनमा विष्ट नेकपा एकीकृत समाजवादी नेतृ रामकुमारी झाँक्रीलाई हराउँदै विजयी भएका थिए । तत्कालीन समयमा कांग्रेससँगको गठबन्धनबाट उम्मेदवार बनेकी झाँक्री यसपटक भने एमालेमै फर्किएकी छिन् ।

विष्टले २८ हजार ४८५ मत लिएर विजयी हुँदा झाँक्रीले २६ हजार ४४१ मत ल्याएकी थिइन् । यसपटक यस निर्वाचन क्षेत्रमा एक लाख सात हजार ३ सय ६३ जना मतदाता रहेका छन् । विष्टसँग भिड्ने अन्य प्रतिस्पर्धीको भने अझै टुंगो छैन ।