सभापति गगन थापा नेतृत्वको नेपाली कांग्रेसको पहिलो कार्यसमिति बैठक पार्टी केन्द्रीय कार्यालयमा बसेन । उनीहरुको बैठक बानेश्वरको बैंक्वेटमा बसेको थियो ।
काठमाडौँ — नेपाली कांग्रेसको दोस्रो विशेष महाधिवेशनबाट निर्वाचित कार्यसमितिलाई निर्वाचन आयोगले शुक्रबार मान्यता दियो । महाधिवेशनबाट गरिएका निर्णयहरूलाई संविधान, कानुन तथा पार्टी विधानअनुसार मान्यता दिँदै आयोगले अद्यावधिक गरिसकेको सन्दर्भमा गगन थापा सभापति रहेको कांग्रेसको पहिलो बैठक भने पार्टी केन्द्रीय कार्यालयमा बसेन । उनीहरुको शनिबारको बैठक नयाँ बानेश्वरस्थित अर्पण बैंक्वेटमा बस्यो ।
निवर्तमान सभापति शेरबहादुर देउवा समूहको बैठक भने लगातार ललितपुरको सानेपास्थित केन्द्रीय कार्यालयमै हुँदै आएको छ ।
गगन थापा समूहका नेताहरूले पार्टी कार्यालय मर्मतको क्रममा रहेकाले आफूहरू केन्द्रीय कार्यालयमा बैठक बस्न नसकेको बताए ।
‘जेन–जी प्रदर्शनपछि भवनहरू जलेका छन् । बैठक बस्ने उपयुक्त स्थान पनि छैन । अहिले मर्मतको काम चलिरहेको छ,’ सह–महामन्त्री प्रकाश रसाइली ‘स्नेही’ले भने, ‘अर्को समूह आवेश र उत्तेजनामा पनि देखिएको छ । भवन निर्माण र मर्मतको प्रक्रियामा छ । काम सकिएपछि हामी पनि केन्द्रीय कार्यालय जान्छौं । हामी एकता र मित्रता खोजिरहेका छौं ।’
रसाइलीले 'निवर्तमान सभापति शेरबहादुर देउवाले गगन थापालाई हात समाएर केन्द्रीय कार्यालयको अध्यक्षको कुर्सीमा राख्दिनु हुन्छ भन्ने चाहना' समेत आफूहरुमा रहेको बताए ।
निर्वाचन आयोगको फैसलापछि देउवा समूह अदालत जाने तयारीमा देखिएको छ भने उनीनिकट व्यक्तिहरू पार्टी कार्यालयको सुरक्षामा खटिएका छन् ।
