काठमाडौँ — कांग्रेसको दोस्रो विशेष महाधिवेशनमा महामन्त्रीद्वय गगन थापा र विश्वप्रकाश शर्माले जेन–जीहरूको भावना र मर्म समेटेर प्रतिवेदन पेस गरेका छन् । महामन्त्री थापाले आफ्नो राजनीतिक प्रस्तावमा जेन–जी आन्दोलनको मर्मका बारेमा उल्लेख गरेका छन् ।

२३–२४ भदौको जेन–जीको आह्वानमा भएको आन्दोलनले नेपाली राजनीतिमा नयाँ चेतना र जागरण स्थापना गरेको स्विकार्दै दमन र हिंसात्मक घटनाबाट सहादत प्राप्त गर्नेहरूप्रति उनले उच्च सम्मान व्यक्त गरेका छन् ।

आन्दोलनले उठाएका न्यायोचित मागहरू, भ्रष्टाचार नियन्त्रण र सुशासन प्रवर्द्धन, सेवा प्रवाह तथा युवा पुस्ताको अर्थपूर्ण प्रतिनिधित्वका सवाललाई आत्मसात् गर्नेसमेत थापाले भनेका छन् । २४ भदौको हिंसाजन्य घटनाको स्वतन्त्र र निष्पक्ष छानबिन, घटनामा संलग्न दोषीमाथि कानुनी कारबाही गर्न आफूहरू कटिबद्ध रहेको समेत उनले उल्लेख गरेका छन् ।

प्रतिवेदनमा युवा पुस्तालाई पार्टीको हरेक तहमा आन्तरिक संगठनदेखि राज्य सञ्चालनका राजकीय तथा सार्वजनिक निकायहरूमा अर्थपूर्ण सहभागिता र निर्णायक प्रतिनिधित्व सुनिश्चित गर्न नीतिगत तथा संरचनागत प्रबन्धसहितको व्यवस्था गर्ने प्रतिबद्धता जनाइएको छ ।

‘भ्रष्टाचारको अन्त्य, सुशासन, पारदर्शिता र सूचनाको हक सुनिश्चितताको त्यो आवाज तथा अभियान आम नागरिककै स्वाभाविक आवाज हो भन्ने नेपाली कांग्रेसको दृढ दृष्टिकोण छ । जेन–जी पुस्ताले परिवर्तनका लागि मुखरित गरेका आवाजहरूको सम्बोधन र संस्थागत रूप दिन आज बहुपक्षीय राष्ट्रिय संवाद अत्यावश्यक छ भन्ने नेपाली कांग्रेसको ठहर छ,’ प्रतिवेदनमा उल्लेख छ ।

युवा वर्गको शिक्षा, रोजगारी र सेवा–सुविधासम्बन्धी आवश्यकतालगायत मुद्दालाई पनि महामन्त्री थापाले आफ्नो प्रतिवेदनमा समेटेका छन् । 

अर्का महामन्त्री विश्वप्रकाश शर्माले पेस गरेको सांगठनिक प्रतिवेदनमा पनि जेन–जी तथा युवा पुस्ताहरूका माग र भावनालाई प्राथमिकता दिइएको छ । प्रतिवेदनमा जेन–जी आन्दोलनलाई प्रणालीविरुद्ध नभई ‘प्रणाली भित्रको खराबी र सुशासनको पक्षमा’ भएको विद्रोहका रूपमा स्वीकार गरिएको छ । जागिरको खोजीमा भौंतारिरहेका बेरोजगार युवाहरू र भ्रष्टाचारका प्रकरणहरूले उनीहरूमा खुसी नरहेको कुरा पनि प्रतिवेदनमा उल्लेख छ । 

महामन्त्री शर्माले युवाहरूलाई नेतृत्व तहमा ल्याउन विधानमै संख्यात्मक प्रतिनिधित्व सुनिश्चित गर्नुपर्ने प्रस्ताव गरेका छन् ।

केन्द्रीय कार्यसमितिदेखि तल्लो तहसम्मै युवा तथा जेन–जीहरूको प्रतिनिधित्व गराउन केन्द्रीय समितिमै ४० वर्षमुनिका ४० जना (३० वर्षमुनिका २० जना र ३०–४० वर्षका २० जना) र प्रदेश कार्यसमितिमा पनि दुवै उमेर समूहबाट १०–१० जना समेट्नुपर्ने महामन्त्री शर्माको प्रस्ताव छ । त्यस्तै जिल्ला, संघीय क्षेत्र, प्रदेशसभा क्षेत्र र पालिका समितिमा न्यूनतम ६–६ जना र वडा कार्यसमितिमा न्यूनतम ४–४ जना युवाहरूको प्रतिनिधित्व प्रस्ताव गरिएको छ ।

जेन–जी अभियन्ताहरूले महामन्त्रीद्वय थापा र शर्माको प्रतिवेदनमा जेन–जीको मर्म र भावनालाई उल्लेख गरिनु तारिफयोग्य भएको बताएका छन् । जेन–जी अभियन्ता तनुजा पाण्डे भन्छिन्, ‘सार्वजनिक गर्नुभएको प्रतिवेदन पढें । त्यसमा हाम्रो आन्दोलनका कतिपय सहमति र बुँदाहरू समावेश भएको पाएँ । विशेष गरी प्रधानमन्त्रीको कार्यकाल कति हुनुपर्छ भन्ने जस्ता विषयहरू समेटिनु सकारात्मक छ ।’

उनका अनुसार आन्दोलनको मुख्य उद्देश्य नै राजनीतिक दलभित्र सुधार हुनुपर्छ भन्ने थियो । अन्य दलहरूको तुलनामा कांग्रेसले उक्त एजेन्डालाई अगाडि बढाउन खोजेको तनुजाको बुझाइ छ ।

‘नेपालमा आफ्नो गल्ती महसुस गर्ने र आत्मबोध गर्ने राजनीतिक संस्कार हराएको थियो । उहाँहरूले जसरी खुला रूपमा गल्ती स्वीकार गर्दै क्षमा माग्नुभयो, यो कुरा केवल पार्टीका कार्यकर्ताले मात्र नभई नेपालको हरेक क्षेत्रका मानिसहरूले सिक्नुपर्ने कुरा हो,’ उनी भन्छिन् ।