काठमाडौँ — कांग्रेसका महामन्त्री विश्वप्रकाश शर्माले पुस २७ र २८ गते काठमाडौंमा आयोजना हुने दोस्रो विशेष महाधिवेशन पार्टी विभाजनका लागि नभई बदलिएको समयअनुसार पार्टीलाई नयाँ ऊर्जा र दिशाबोध दिनका लागि भएको स्पष्ट पारेका छन् । 

सामाजिक सञ्जालमार्फत् आफ्ना धारणा सार्वजनिक गर्दै शर्माले विशेष महाधिवेशन पूर्ण रूपमा वैधानिक, बाध्यकारी र समयको माग भएको बताएका छन् ।

विशेष महाधिवेशनको आह्वान भइसकेपछि पार्टीभित्र र बाहिर उठिरहेका जिज्ञासालाई सम्बोधन गर्दै शर्माले विशेष महाधिवेशन भए पार्टी फुट्छ कि भन्ने आशंका अस्वीकार गरेका छन् । “विशेष महाधिवेशन हुन्छ, पार्टी विभाजित हुँदैन,” भन्दै उनले पार्टी विभाजनको अवस्था आए आफू सबैभन्दा पहिला अधिवेशन हलबाट बाहिरिने र पार्टी जोगाउन सबैसँगै उभिने बताएका छन् ।

महाधिवेशनको वैधानिकतामाथि प्रश्न उठ्नु अनावश्यक भएको उल्लेख गर्दै शर्माले पार्टी विधानको धारा १७(२) अनुसार ४० प्रतिशत महाधिवेशन प्रतिनिधिले विशेष कारणसहित लिखित माग गरेमा तीन महिनाभित्र विशेष महाधिवेशन बोलाउनुपर्ने बाध्यकारी व्यवस्था रहेको स्मरण गराएका छन् । उनका अनुसार केन्द्रीय समितिले आवश्यक ठानेन भन्दै विशेष महाधिवेशन रोक्न मिल्दैन ।

विशेष महाधिवेशन आवश्यक पर्नुको कारण उल्लेख गर्दै शर्माले अहिलेको नेपाल भदौ २३ अघिको नेपाल नरहेको बताएका छन् । समय, परिस्थिति, चुनौती र जिम्मेवारी बदलिएको अवस्थामा पार्टीले एउटै थलोमा उभिएर नयाँ दृष्टि, योजना र संकल्प लिनुपर्ने आवश्यकता रहेको उनको भनाइ छ । त्यसैले विशेष परिस्थिति, विशेष निर्णय र विशेष महाधिवेशन अपरिहार्य भएको उनले उल्लेख गरेका छन् ।