काठमाडौँ — मुलुकमा संवेदनशील अवस्था आएकाले विशेष महाधिवेशन बोलाउनुपरेको कांग्रेस महामन्त्री गगन थापाले बताएका छन् ।

केन्द्रीय कार्यसम्पादन समितिको बैठकपछि थापाले विशेष महाधिवेशन रोक्नुपर्ने भनी कार्यवाहक सभापति पूर्णबहादुर खड्काले पार्टी विधानको विपरीत प्रस्ताव ल्याएको पनि बताए ।  

बिहीबार सानेपामा बसेको केन्द्रीय कार्यसम्पादन समिति बैठकपछि थापाले महाधिवेशन प्रतिनिधिले माग गरेबमोजिम विशेष महाधिवेशन आवश्यक रहेको बताए । 'अवस्था संवेदनशील भएकोले विशेष महाधिवेशनमा आएको हो । भदौ २३ गते अगाडि कसले विशेष महाधिवेशन मागेको थियो र हामी सबै नियमित महाधिवेशन छ । अझ त्यसमाथि पनि एक वर्ष म्याद थपिछ भन्ने कुरा सबैलाई थाहा थियो,' थापाले भने, 'हामीले २०८३ सालमा महाधिवेशन हुन्छ भनेकै थियौ । यो कुरा कहाँ निर आएर जोडियो भने म फेरी दोहोर्याउछु, हामी भदौ २३ र २४ गते नेपालमा नवयुवाहरूले एउटा ठुलो विद्रोह गरे । नागरिकहरुले ठुलो असन्तुष्टि पोखे ।'

थापाले जेन-जी युवाहरूले उठाएको आवाजलाई कांग्रेसले पनि सुन्नुपर्ने बताए । महाधिवेशन माग गर्नेहरूले भदौ २३ र २४ को परिवर्तन किन भयो ? कसरी भयो? हाम्रो भूमिका के रह्यो ? कहाँ सहि कहाँ गलत ? यो सबैको विश्लेषण गरौ । नीति पनि फेरौं, नेता पनि फेरौ त्यसका निम्ति अधिवेशन गरौ ।'

मंसिरभित्र नियमित महाधिवेशन माग गर्दा सम्भव नभएपछि विशेष महाधिवेशनको अवस्था आएको थापाको भनाइ थियो । कार्यसम्पादन समिति बैठकमा कार्यवाहक सभापति पूर्णबहादुर खड्काले सहमतिको प्रस्ताव नल्याएको थापाको भनाइ थियो । खड्काको प्रस्तावको मुख्य विषय विशेष महाधिवेशन आवश्यक नभएको रहेको र त्यसमा आफू सहमत नरहेको थापाले बताए । 'यो सरासर विधानको खिलाफ छ । मैले बैठकमा पनि यो कुरा राखेको छु । मैले गोदावरीको महासमितिको बैठकमै २०८२ सालमा नियमित महाधिवेशनको कार्यतालिका प्रस्तुत गरेको थिए । त्यो बेलामा के भनियो भने यो केन्द्रिय कार्यसमितिको अधिकार हो पछि गरौ । केन्द्रीय कार्यसमितिले महाधिवेशनको कार्यतालिका व्यवस्थित ढंगले चलाउने हो भने त नयाF केन्द्रीय कार्य समिति आउन साथै बनाए हुन्छ । हामी चार वर्षपछि यसोयसो गर्छौ भनेर बनाए हुन्छ । त्यो त कार्यतालिका मात्रै हो नि कार्यतालिका आयो । त्यसकारणले गर्दा खेरि यो विधान सबैले बोलाउनु पर्दैन भनेर भन्ने कुरा ठाडै विधानको अपव्याख्या हो,' थापाले भने । 

कार्यवाहक सभापतिले विधानको व्यवस्था उल्लेख नगरी विशेष महाधिवेशनको विरुद्धमा प्रस्ताव ल्याएको पनि थापाको भनाइ थियो । 'कुनै धारा कोड गर्न सकिन्छ कि भनेर बडो मेहेनत गरेको पाए मैले । के भन्यो भने चाहिँ भन्न सकिन्छ भनेर यहाँ यो लामो छलफल भएको पाए । तर केहि पनि भन्न सकिएन । पार्टीको विधान अनुसार नियमित महाधिवेशनको कार्यसूची घोषणा भएपछि विशेष महाधिवेशन आवश्यक छैन मात्र भनियो । यो विधान सम्मत छँदै छैन । विधानको अपव्याख्या हो यो,' थापाले भने, 'सभापति लगायत सबै साथीहरूलाई भनेको छु । केन्द्रले नबोलाएको बेलामा विशिष्ट आवश्यकता महसुस गर्यो भने महाधिवेशन प्रतिनिधिहरूले तिमीहरुसँग पनि यो हक छ है भनेर हक स्थापित गरेको हो । यो सबै ठाउँमा हुन्छ । यो एउटा बैंकमा पनि हुन्छ । सहकारीमा पनि हुन्छ । जहाँ मेम्बरसिप हुन्छ त्यहाँ हुन्छ यो । वार्षिक सभा बोलाउनु पर्छ तर बोलाएन भने यति प्रतिशतले बोलाउन पाइन्छ भन्या हुन्छ ।'

विशेष महाधिवेशनको माग नीति र नेता फेर्ने रहेको थापाले स्पष्ट पारे । 'छिटो-छिटो गर्न सकिन्छ भने मंसिरभित्रमा नियमित गरौं । तपाई त्यो हाम्रो जिम्मा थियो नि त हैन नियमित अधिवेशन त । फेरी कसैले माया गर्दा पाइँदैन । तर तपाईहरु छिटो-छिटो मंसिरमा गर्न सक्नुहुन्न भने पुरानै महाधिवेशन प्रतिनिधिबाट विशेष महाधिवेशन गरौं, नेता फेरौ, नीति फेरौ राष्ट्रिय संकल्प गरौं यही भनेको त हो नि,' उनले भने ।

विशेष महाधिवेशनले पार्टी विभाजन गर्छ भन्ने कुरामा सत्यतता नरहेको पनि महामन्त्री थापाले बताए । 'विधानको कार्यान्वयन गर्दाखेरि पार्टीलाई विभाजन तर्फ लैजान्छ भन्ने कुराको हावा किन पिटी राखिएको छ यो ? पार्टीको विभाजन कसले चाहेको हो यो ? किन लगातार पार्टीको महाधिवेशन प्रतिनिधिहरू जो विशेष महाधिवेशनमा सहभागी हुन आउँदै हुनुहुन्छ उहाँ पार्टीको महाधिवेशन प्रतिनिधि हो । विधानको आफ्नो हक प्रयोग गरेर महाधिवेशन मागिराख्नु भएको छ । उनलाई के भनिएको छ भने विधानको यो धारा प्रयोग गरियो भने विभाजन तर्फ जान्छ,' थापाले भने, 'विधानको यो धाराको प्रयोग गरिएन वा कार्यान्वयन गरिएन यत्रो देश भरिका साथीहरुले भनेको कुरालाई एकपटक सुन्ने प्रयास गरिएन । उनले जे भन्यो त्यो हुनुपर्छ भन्ने छैन । उहाँहरुले जे भन्नुभयो त्यो हुन्छ भन्ने पनि छैन नहुन सक्ला नि त । तर एकपटक सुन्ने प्रयास पनि भएन एक पटक संवाद गर्ने प्रयास पनि गरेन भने पो बरु पार्टी टुट्ला । पार्टी टुट्ने भनेको चाहिँ केवल औपचारिक रुपमा पार्टी टुट्ने पार्टीको कार्यकर्ताहरुको विश्वास टुट्ने कुरा हो नि त ।'