बन्द सूची पेस गर्दा दलले ५० हजार धरौटी राख्नुपर्ने प्रावधान छ । प्रक्रिया आइसकेका सबै राजनीतिक दलको बन्द सूची बुझिने आयोगले जनाएको छ । 

दलहरुले कार्यालय समयभित्र नामावली नल्याइदिंदा बन्द सूचीमाको रूजु गर्ने र त्यसलाई बुझ्ने क्रम अबेर रातिसम्म चलिरहेको छ ।

२१ फागुनमा निर्धारित प्रतिनिधिसभा निर्वाचनका लागि राजनीतिक दलहरूले समानुपातिक निर्वाचन प्रणालीतर्फ उम्मेदवारको बन्दुसूची बुझाएसँगै मुलुक चुनावी माहोलमा होमिएको छ । आयोग परिसरमा बिहानैदेखि राजनीतिक दलका नेता, कार्यकर्ता र समर्थकहरुको चहलपहलले मुलुक चुनावमा होमिएको सन्देश प्रवाहित भएको हो ।

प्रतिनिधिसभाको कुल २ सय ७५ सदस्य सदस्य मध्ये १ सय १० जना समानुपातिक निर्वाचन प्रणालीबाट छानिन्छन् । राजनीतिक दलले प्राप्त गरेको मतका आधारमा सम्बन्धित दलले सिट पाउने र दलले बन्द सूचीमा समावेश भएका समावेशी क्लस्टरबाट क्रम संख्या अनुसार आयोगले सदस्य निर्वाचित गर्छ । समानुपातिक निर्वाचन प्रणालीतर्फको कूल सदर मतको तीन प्रतिशत वा सोभन्दा बढी मत प्राप्त गर्ने दलको तर्फबाट मात्र उम्मेदवार निर्वाचित हुने कानुनी व्यवस्था छ ।