विराटनगर — हर्क साम्पाङ नेतृत्वको श्रम संस्कृति पार्टी भर्खरै बामे सर्दैछ । तर, यो ‘शिशु पार्टी’मा विवादका शृंखलाहरू क्रमशः दोहोरिरहेका छन् ।

बम काण्डमा नाम जोडिएका उपाध्यक्ष देवराज लामालाई बुधबार मात्रै निलम्बन गरेका साम्पाङले सोमबार साँझ अर्का उपाध्यक्ष डा. मित्र परियारलाई पनि निलम्बन गरिएको कुरा प्रेस विज्ञप्तिमार्फत सार्वजनिक गरे । परियार निलम्बनको घटना भने यति बेला सामाजिक सञ्जालमा निकै ‘भाइरल’ भइरहेको छ ।

साम्पाङले विज्ञप्तिमा उल्लेख गरेअनुसार, परियारलाई निलम्बन गर्नुपर्ने दुई मुख्य कारण छन् ।

पहिलो, पुस ५ गते बुटवलमा आयोजित आमसभामा आयोजक टिममाथि आचारसंहिता विपरीत अभद्र शैलीमा सार्वजनिक अभिव्यक्ति दिनु । दोस्रो, जिल्ला सहसंयोजक केशव केशव न्यौपानेलाई अपमानजनक शब्द प्रयोग गरी गालीगलौज गर्नु ।

दोस्रो कारण त सार्वजनिक छैन । तर, पहिलो कारणअनुसार चाहिँ के परियारले साँच्चै पार्टी आचारसंहिता विपरीत अभिव्यक्ति दिएका थिए वा उनले पार्टीलाई प्रश्न गरेका थिए ? बुटवलको आमसभामा बोल्दा उनले पार्टीको निर्देशन विपरीत बोलेको र आयोजक टिमलाई अपमान गरेको दाबी गरिएको छ ।

दलित अभियन्ता परियारलाई मंसिरको अन्तिम साता काठमाडौंमा सम्पन्न केन्द्रीय कमिटी बैठकले उपाध्यक्षमा मनोनीत गरेको थियो ।

बुटवल आमसभामा भएको के थियो ?

पुस ५ को आमसभाका लागि दुई दिनअघि नै आफू बुटवल पुगेको परियारले जनाएका छन् । सभा सफल पार्न खटेको पनि दाबी गरेका छन् । तर, आफूलाई सभामा बोल्न नदिएको भन्दै उनले आयोजक टिममाथि आपत्ति जनाए । उनले मञ्चबाट भनेका छन्, ‘म केन्द्रीय उपाध्यक्ष हुँ । मैले पनि बोल्न पाउनुपर्छ । ध्यान अन्ततिर मोडिनु हुँदैन । यति भन्नु पाप हो त ? अपराध हो त ?’

उनको यस्तो प्रतिक्रिया देखेपछि अध्यक्ष साम्पाङ मञ्च छोडेर तल ओर्लिए र समर्थकसँग फोटो खिच्न थाले । परियारले उनलाई रोक्न खोज्दै कडा स्वरमा भने, ‘स्टप इट नाउ, क्यान यु स्टप इट फर नाउ ?’ पार्टीले परियारको अभिव्यक्तिलाई आयोजक टिमको निर्णय, समय तालिका र व्यवस्थापनलाई चुनौती दिएको रूपमा लियो । त्यही सामान्य कारण नै निलम्बनको निहुँ बन्यो ।

‘श्रम संस्कृति पार्टीका सबै सदस्य श्रमदाता हुन् । पार्टीको मूल दर्शनअनुसार पद वा सत्ताको आडमा अरूलाई उपेक्षा वा अपमान गर्नु हुँदैन,’ विज्ञप्तिमा उल्लेख छ । ‘परियारको व्यवहारले सदस्यता र नेतृत्वको समानता प्रतिकूल रहेको ठहर गर्दै पार्टीले निलम्बन गरेको हो ।’

निलम्बनपछि परियारले सामाजिक सञ्जालमार्फत आफ्नो धारणा सार्वजनिक गरे । उनले भने, ‘जानीजानी हो वा अनजानमा हो, आयोजकले मलाई अपमान गर्‍यो । सेड्युल मिलाउन जानेन ।’

पार्टी अध्यक्ष साम्पाङले गत मंसिर १६ मा सार्वजनिक रूपमा स्पष्ट पारेका थिए कि श्रम संस्कृति पार्टीको मूल सिद्धान्त ‘हर्कवाद’ हो । यो दर्शनअनुसार श्रम, श्रमदान र समानताको आधारमा मात्र सामाजिक, आर्थिक र राजनीतिक विकास सम्भव छ । श्रमबाट मात्रै अभाव, गरिबी, विभेद र त्यसबाट उत्पन्न द्वन्द्व, विनाश र अशान्तिको अन्त्य सम्भव छ ।