काठमाडौँ — कुनै बेला केपी शर्मा ओलीलाई 'फुटबलको पेले' भन्ने एमाले नेता कृष्णगोपाल श्रेष्ठ पछिल्लो समय भने ईश्वर पोखरेल समूहमा खुलेका छन् । १०औं महाधिवेशनबाट एमाले स्थायी कमिटी सदस्यमा चुनिएका उनी ११औं महाधिवेशनमा भने पोखरेल समूहबाट सचिवमा उम्मेदवार नै बन्ने भएका छन् । 

उनै श्रेष्ठ कुनै बेला भने केपी ओलीको प्रशंसामा लामो समय खर्चन्थे ।  २०७८ सालमा शिक्षामन्त्री हुँदा श्रेष्ठले ओली शक्तिशाली रहेको भन्दै फुटबलका महान खेलाडी पेलेसँग तुलना गरेका थिए ।

त्रिवि दीक्षान्त समारोहमा उनको भाषण चर्चितसमेत बन्यो । उनले त्यतिबेला भनेका थिए, ‘केपी ओली इज द केपी ओली, फुटबलको पेलेजस्तै हो, कोही माइकालाल छ सडकमा ल्याएर पछार्न सक्ने ? के राजीनामा दे भन्दा यत्तिकै राजीनामा दिन मिल्छ ? ढुक्क हुनूस् हिजोको भन्दा पावरफुल सरकारको एजुकेसन मिनिस्टर तपाईंहरूको अगाडि छ । यो कुनै अदालतको माया पाएर आएको सरकार हो ? अदालतको फैसलाले समाधान निस्किँदैन ।’

श्रेष्ठ यसअघि २०७९ मा काठमाडौं-९ बाट प्रतिनिधिसभा सदस्यमा निर्वाचित भएका थिए ।  त्यसअघि प्रतिनिधिसभा सदस्य निर्वाचन २०४८ मा काठमाडौं ५ र मध्यावधि निर्वाचन २०५१ मा काठमाडौं ७ बाट निर्वाचित भएका थिए । यस्तै, संघीय संसद् प्रतिनिधिसभा सदस्य निर्वाचन २०७४ मा पनि उनी काठमाडौं-९ बाट निर्वाचित भएका थिए ।