२०४८ मा राष्ट्रियसभा सदस्यमा मनोनित उपाध्याय २०५६ मङ्सिर २३ गते सम्पन्न भएको उपनिर्वाचनमा मोरङ निर्वाचन क्षेत्र नं १ बाट प्रतिनिधिसभा सदस्य पदमा निर्वाचित भएका थियो । २०५६ मा उनी शिक्षा तथा खेलकुदमन्त्री थिए भने २०६२/०६३ को जनआन्दोलनपश्चात् पुनःस्थापित व्यवस्थापिका संसद्को सदस्य रहे । २०६४ को संविधानसभा सदस्य निर्वाचनमा मोरङ निर्वाचन क्षेत्र नं. १ बाट उनी निर्वाचित भएका थिए ।

शालिन र बौद्धिक व्यक्तित्वका रूपमा पार्टीमा परिचित उपाध्यायले २०६९ मा पार्टीको केन्द्रीय अनुशासन समितिको संयोजक भएर कुशलतापूर्वक जिम्मेवारी निर्वाह गर्नुभएको कांग्रेसले जनाएको छ । राजनीतिक सङ्घर्षका क्रममा पटक–पटक पक्राउ परी जेल बसेका उपाध्यायले निर्वासित जीवनसमेत बिताएका थिए । समाजसेवा र अध्ययनमा विशेष रुची राख्ने उपाध्यायका विभिन्न पत्रपत्रिकाहरूमा लेख रचनासमेत प्रकाशित भएका छन् ।