डोटी — नेपाली कम्युनिष्ट पार्टीका नेता भीम रावलले सरकारको गतिविधिहरु हेर्दा तोकिएकै समयमा प्रतिनिधिसभाको निर्वाचन हुने कुरामा शंका उत्पन्न भएको बताएका छन् ।

नेपाली कम्युनिष्ट पार्टीको एकता सन्देश सभालाई सम्बोधन गर्न डोटी पुगेका नेता रावलले सरकार चुनावको वातावरण बनाउनेभन्दा अरू अरू कुरामै बरालिएको आरोप लगाए । ‘लुटिएका हजारौँ गोलीगट्ठाहरु, घातक हतियारहरू अहिलेसम्म नियन्त्रणमा लिन सकेको छैन, कयौँ कैदीबन्दीहरू अहिले पनि फरार छन्,’ बिहीबार डोटीको सिलगढीमा आयोजित पत्रकार सम्मेलनमा उनले भने, ‘शान्ति सुरक्षाको स्थिति हेर्दा यो सरकारले जसरी त्यसलाई केलाएर हेर्नु पर्ने हो, त्यो गरिरहेको देखिँदैन ।’

उनले सरकारले सबै दलहरूलाई निर्भिकतापूर्वक निर्वाचनमा भाग लिने वातावरण बनाउनु पर्ने बताए । निर्वाचनमा आन्तरिक वा बाह्य कुनै पनि प्रकारको हस्तक्षेप हुन नहुने उनको भनाइ छ ।