उनले नेकपाले ‘देशलाई नयाँ दिशामा लैजाने’ उद्देश्यसहित विभिन्न धार र पृष्ठभूमिबाट आएका १६ वटा राजनीतिक समूह र दलहरू समाहित गर्न सफल भएको दाबी गरे । राष्ट्रको हितलाई पहिलो प्राथमिकतामा राखेर, विगतका गल्ती सच्याउँदै, एकीकृत पार्टीको रूपमै देशहितमा योगदान गर्ने उद्धेश्यले नेकपा स्थापना भएको उनले बताए ।

रावलले देशको आर्थिक रूपान्तरणको मूल आधार औद्योगिकीकरण भएको बताएका छन् । प्राकृतिक स्रोत–साधन, जनशक्ति र बुद्धिको सदुपयोग गर्न सके मात्रै समृद्ध नेपालको सपना पूरा हुने उनको तर्क थियो । देशका पौरख र सीपलाई यही मातृभूमिको विकासका लागि उपयोग गरी उद्योग, कृषि, पूर्वाधार र सीपमा आधारित उत्पादनलाई जोड दिएर मात्र रोजगारी र समृद्धि सम्भव रहेको उनले जोड दिए ।

कार्यक्रममा बोल्दै रावलले पार्टीले अघि सारेका प्रमुख एजेन्डामध्ये सुशासन, भ्रष्टाचार नियन्त्रण, असमान सन्धि पुनरावलोकन, आर्थिक आत्मनिर्भरता र जनजीविकामा सुधारलाई शीर्ष प्राथमिकता दिएको उल्लेख गरे । उनले राजनीतिक द्वन्द्व, अविश्वास र विभाजनले देशलाई कमजोर बनाउने भएकाले एकता र स्पष्ट उद्देश्यको राजनीतिमात्रै दीर्घकालीन समाधान हुन सक्ने बताए ।