काठमाडौँ — ऊर्जामन्त्री कुलमान घिसिङ रहने चर्चा गरिएको उज्यालो नेपाल पार्टीको घोषणा सभा केही बेरमा सुरु हुँदै छ । पूर्वसचिव अनुपकुमार उपाध्याय अध्यक्ष रहेको पार्टीले बुधबार राष्ट्रिय सभा गृहमा घोषणापत्र सार्वजनिक गर्न लागेको हो ।

बुधबार नै औपचारिक रूपमा पार्टीको घोषणा पनि हुने नेताहरूले बताएका छन् । यद्यपि निर्वाचन आयोगमा दल दर्ता भइसकेको छ । चुनाव चिह्न बलेको चिम रहेको छ । 

बुधबारको सभामा ऊर्जामन्त्री कुलमान घिसिङले प्रमुख अतिथिका रूपमा सम्बोधन गर्दैछन् । नेपालको संविधानका उपलब्धिलाई आत्मसात् गर्दै जनताको प्रतिस्पर्धात्मक बहुदलीय लोकतान्त्रिक शासन प्रणाली, नागरिक स्वतन्त्रता, मौलिक अधिकार, मानव अधिकार, बालिग मताधिकार, आवधिक निर्वाचन, प्रेस स्वतन्त्रता, निष्पक्ष, सक्षम न्यायपालिका र कानुनी राज्यको अवधारणा सो पार्टीका सैद्धान्तिक दृष्टिकोण रहेका छन् ।