पोखरा — नेपाली कम्युनिष्ट पार्टीका सह–संयोजक माधवकुमार नेपालले देशमा भएका राजनीतिक परिवर्तनलाई संस्थागत गर्न अब आर्थिक तथा सामाजिक रूपान्तरणको महाभियान जरुरी रहेको बताएका छन् ।

व्याप्त भ्रष्टाचार, कुशासन, बेरोजगारी र विदेशी निर्भरतालाई अन्त्य गर्दै समानता र न्यायमा आधारित ‘नेपाली विशेषताको समाजवाद’ प्राप्त गर्ने लक्ष्यका साथ कम्युनिस्टहरू एकताबद्ध भएको उनले बताए ।

पोखराको मानवअधिकार चोकमा आइतबार आयोजित एकता सन्देशसभालाई सम्बोधन गर्दै उनले राजनीतिक अस्थिरता र आर्थिक संकटको समाधानका लागि सशक्त योजना र इमानदारिता आवश्यक रहेकोमा जोड दिए । नेता नेपालले देशको राजनीति बिग्रिनुको मूल कारण बेइमानी, भ्रष्टाचार र जनतालाई बेवास्ता गर्ने स्वार्थी र व्यक्तिवादी प्रवृत्ति रहेको उनले औंल्याए ।  नयाँ पुस्ताका समस्यालाई नसुन्ने प्रवृत्तिले पनि देशलाई पछि पारेको उनको भनाइ थियो । ।