नेता तथा कार्यकर्ताहरूले नियमित महाधिवेशन नहुने सम्भावना देखेपछि विशेष महाधिवेशन बोलाउन दबाब दिन भेला गर्न लागेका हुन् ।
काठमाडौँ — विशेष महाधिवेशनका लागि दबाब दिन हस्ताक्षरकर्ता प्रतिनिधिहरुले आज काठमाडौँमा भेला गर्दै छन्।
दिउँसो १ बजेपछि राष्ट्रिय सभागृह भृकुटीमण्डपमा हुने गरी भेला आयोजना गरिएको नेता गुरुराज घिमिरेले जानकारी दिए।
भेलामा काठमाडौँ बाहिरबाट पनि प्रतिनिधि तथा कार्यकर्ताहरू सहभागी हुँदै छन्। जेन-जी आन्दोलन लगत्तै पार्टीको सुधार र पुनर्गठन गर्नुपर्ने र त्यसका लागि चुनाव अगाडि नै महाधिवेशन गर्नु पर्ने माग गर्दै आएका नेता तथा कार्यकर्ताहरूले नियमित महाधिवेशन नहुने सम्भावना देखेपछि विशेष महाधिवेशन बोलाउन दबाब दिन लागेका हुन् ।
उनीहरूले विशेष महाधिवेशन माग गर्दै देशभरका ५४ प्रतिशत महाधिवेशन प्रतिनिधिहरूको हस्ताक्षर पार्टीका कार्यवाहक सभापति पूर्णबहादुर खड्कालाई असोज २८ गते नै बुझाएका थिए । काँग्रेसको विधानमा ४० प्रतिशत महाधिवेशन प्रतिनिधिहरूले माग गरेमा ३ महिना भित्रका विशेष महाधिवेशन बोलाउनु पर्ने व्यवस्था रहेकाले पुस २८ भित्र नियमित वा विशेष महाधिवेशन गर्नुपर्ने वैधानिक बाध्यतामा काँग्रेस परेको छ ।
बहुमतभन्दा बढी महाधिवेशन प्रतिनिधिहरूको माग बमोजिम महाधिवेशन गर्ने निर्णय काँग्रेस केन्द्रीय समितिले गर्नुपर्ने उनीहरूको माग छ।
