‘५४ प्रतिशत महाधिवेशन प्रतिनिधिको हस्ताक्षरलाई सम्बोधन नगरी पार्टी अघि जान सक्दैन ।’
काठमाडौँ — कांग्रेस महामन्त्री गगन थापाले अब विशेष महाधिवेशनको विकल्प नभएको बताइरहेका बेला अर्का महामन्त्री विश्वप्रकाश शर्माले भने अझै पुस मसान्तभित्रै नियमित महाधिवेशन गर्न सकिने विकल्प अघि सारेका छन् ।
पुस अन्तिम साताका लागि नियमित महाधिवेशन गर्नेगरी अबको बैठकबाट कार्यतालिका निर्माण गरिनुपर्ने उनको माग छ । ‘महाधिवेशन तयारी क्रममा केही दिन समय नपुग्न सक्ने अवस्था देखिए, थप १५ दिन समय लिएर महाधिवेशन सम्पन्न गर्ने,’ उनले सोमबार इलाम सदरमुकाममा कार्यकर्ताहरुलाई सम्बोधन गर्दै भने ।
शर्माले फागुन २१ को निर्वाचन पनि सर्न सक्ने अनुमान व्यक्त गरेका छन् । ‘समानुपातिकको सूची बुझाउने मिति या फागुन २१ को चुनाव पनि केही पछि सर्न सक्छ, शान्तिपूर्ण वातावरण बन्नुपर्ने आवश्यकता र हिमाली क्षेत्रको मौसमी प्रतिकूलता दृष्टिगत गरेर थोरै पछि सर्न सक्ने सम्भावनालाई राजनीतिक सहमतिमार्फत हल खोज्नु उत्तम हुनेछ,’ उनले भने ।
शर्माले नियमित महाधिवेशनमा नजाने हो भने दोस्रो विकल्पमा २०१४ सालमा सुवर्ण शमशेरको पथ समात्न सभापति शेरबहादुर देउवालाई आग्रह गरेका छन् ।
२०१४ सालमा सभापति रहेका सुवर्ण शमशेरले विशेष महाधिवेशनमार्फत बीपी कोइरालालाई सभापति हस्तान्तरण गरेका थिए । ‘त्यसले एकातर्फ पार्टीले निकास प्राप्त गर्छ, अर्कोतर्फ उहाँको सम्मान र अभिभावकत्वको भूमिकाले उचाइ पाउनेछ,’ शर्माले भने, ‘५४ प्रतिशत महाधिवेशन प्रतिनिधिको हस्ताक्षरलाई सम्बोधन नगरी पार्टी अघि जान सक्दैन ।’
