काठमाडौँ — प्रतिनिधिसभा निर्वाचनमा भाग लिने प्रयोजनका लागि ६४ राजनीतिक दल सोमबारसम्म निर्वाचन आयोगमा दल दर्ताको निवेदन दिएका छन् । प्रतिनिधिसभा निर्वाचन प्रयोजनका लागि दल दर्ताको अवधि अझै दुई दिन बाँकी छ । उक्त अवधिमा निर्वाचनमा भाग लिन चाहने दलहरूको संख्या अझै थपिने निश्चित छ ।

विघटित प्रतिनिधिसभामा प्रतिनिधित्व रहेको १४ राजनीतिक दलमध्ये १२ राजनीतिक दलले २१ फागुनमा हुने प्रतिनिधिसभा निर्वाचनमा भाग लिने उद्देश्यले दल दर्ताको निवेदन दिइसकेका छन् । नेपाली कांग्रेस, नेपाली कम्युनिस्ट पार्टी(तत्कालीन माओवादी केन्द्र र एकीकृत समाजवादीसहितका दल एकीकरणपछि गठित), राष्ट्रिय स्वतन्त्र पार्टी, जनता समाजवादी पार्टी, जनमत पार्टी, जनता समाजवादी पार्टी नेपालले आयोगमा निर्वाचन प्रयोजनका लागि दल दर्ताको निवेदन दिइसकेका छन् ।

त्यस्तै, अघिल्लो प्रतिनिधिसभामा प्रतिनिधित्व रहेको लोकतान्त्रिक समाजवादी पार्टी नेपाल, नागरिक उन्मुक्ति पार्टी, नेपाल मजदुर किसान पार्टी, राष्ट्रिय जनमोर्चा र आमजनता पार्टी दर्ता प्रक्रियामा पुगिसकेका छन् । विघटित प्रतिनिधिसभामा सिट संख्याका हिसाबले दोस्रो स्थानमा रहेको एमाले र पाँचौ नम्बरको राष्ट्रिय प्रजातन्त्र पार्टीले प्रतिनिधिसभा चुनावी प्रयोजनका लागि दर्ता निवेदन दिन बाँकी छ । एमालेले प्रतिनिधिसभा पुनर्स्थापनाको माग उठाइरहेको छ । तर, दल दर्ताको तयारी भने गरेको बुझिएको छ । पार्टीका प्रचार विभाग प्रमुख राजेन्द्र गौतमले आवश्यकता अनुसार दललाई अयोगमा अद्यवाधिक गरिने बताए । ‘अझै समय बाँकी छ । १० गते बेलुका ५ बजे समयको समय छ,’ उनले भने ‘संवैधानिक रुपमा गठित राजनीतिक दलले आफूलाई समयभित्रै अद्यावधि गर्छ ।’ राप्रपाका प्रवक्ता मोहनकुमार श्रेष्ठले दर्ताका लागि पार्टीले आवश्यक तयारी गरिसकेको बताए । उनले मंगलबार दल दर्ताका प्रक्रियाका लागि आयोग जाने जानकारी दिएका छन् ।

संविधानको धारा २७१ र राजनीतिक दल सम्बन्धी ऐन, २०७३ को दफा ४८ ले आयोगमा दर्ता भएका दलले सम्बन्धित निर्वाचनमा भाग लिन प्रयोजनका लागि पुनः दल दर्ता गराउनुपर्ने भनेको छ । त्यसै अनुसार २१ फागुनको निर्वाचनका लागि आयोगले दल दर्ताका लागि १–१० मंसिरको समय निर्धारण गरेको छ । सोमबारसम्म आयोगमा दर्ता भएका दलहरूको संख्या १ सय ३५ पुगेको छ । आयोगका प्रवक्ता नारायणप्रसाद भट्टराईले प्रतिनिधिसभा निर्वाचनमा भाग लिन चाहने दलले निर्वाचन प्रयोजनका लागि पुनः दर्ता हुनुपर्ने बताउँछन् । आयोगमा दर्ता रहेका १ सय ३५ राजनीतिक दलमध्ये सोमबारसम्म ६४ दलले प्रतिनिधिसभा निर्वाचनमा भाग लिन्छु भनेर निवेदन दिएको उनले बताए । दलहरुले पेस गरेको कागजातहरुको अध्ययनपश्चात आयोगले दर्ता गरिएका दलहरुको नामलाई अन्तिम रूप दिनेछ ।

यसअघि निर्वाचनलाई बहिष्कार गर्दै आएका नेत्रविक्रम चन्दले पनि आयोगमा राजनीतिक दल दर्ता गराएर सोमबार निर्वाचनमा भाग लिने प्रयोजनका लागि पनि निवेदन दिएका छन् । चन्दको नेतृत्वमा नेपाल कम्युनिस्ट पार्टी(माओवादी) नामको दल दर्ता भइसकेको छ ।

प्रतिनिधिसभा निर्वाचन घोषण भएयता १६ वटा नयाँ राजनीतिक दल दर्ता भएको आयोगले जनाएको छ । सोमाबार मात्रै तीनवटा राजनीतिक दलले दल दर्ताको प्रमाणपत्र पाएको छ । अधिवक्ता रमणकुमार नेतृत्वको जनादेश पार्टी नेपाल, गणेशकुमार मण्डलको नेतृत्वमा सार्वभौम नागरिक पार्टी र श्रृया केसीको नेतृत्वमा नागरिक सेवा पार्टी दर्ता भएको छ । यसअघि रत्नप्रसाद श्रेष्ठको नेतृत्वमा नागरिक सर्वोच्चता पार्टी नेपाल, खगेन्द्र सुनारको नेतृत्वमा हाम्रो पार्टी नेपाल, सत्यवानकुमार सिंहको नेतृत्वमा स्वाभिमान पार्टी दर्ता भइसकेको छ । त्यस्तै, अनुपकुमार उपाध्यायको नेतृत्वमा उज्यालो नेपाल पार्टी, प्रशान्त सिंहको पिपुल फर्स्ट पार्टी, योगेन्द्र मण्डल नेतृत्वको राष्ट्रिय उर्जाशील पार्टी, नेपाल, दर्ता भएको छ ।