शुक्रबार काठमाडौंमा बुद्धिजीवीसँगको भेलामा ओलीले राष्ट्रपतिले असंवैधानिक ढंगले सभा विघटन गरेकाले पुनःस्थापनाको जिम्मेवारी पनि राष्ट्रपतिमै रहेको बताए।
काठमाडौँ — नेकपा (एमाले) का अध्यक्ष तथा निवर्तमान प्रधानमन्त्री केपी शर्मा ओलीले राष्ट्रपति रामचन्द्र पौडेलले विघटित प्रतिनिधिसभा पुनःस्थापना गर्नुपर्ने बताएका छन् ।
शुक्रबार काठमाडौंमा आयोजित बुद्धिजीवीहरूसँगको भेलामा बोल्दै उनले राष्ट्रपति पौडेलले असंवैधानिक ढंगले प्रतिनिधि सभा विघटन गरेकाले पुनःस्थापना पनि राष्ट्रपतिले नै गर्नुपर्ने बताए ।
अध्यक्ष ओलीले प्रतिनिधिसभा पुनःस्थापना अदालतले नगरे राष्ट्रपतिले गर्नै पर्ने जिकिर गर्दै आफ्नो पार्टीको माग सत्य भएको दाबी गरे । उनले सो मागको समर्थनमा आम नेपाली जनता उभिनुपर्ने आवश्यकता औँल्याए ।
ओलीले भने, ‘हामी विघटित प्रतिनिधि सभाको तत्काल पुनःस्थापनाको माग लिएर हरेक नेपाली जनता आन्दोलित हुनुपर्छ । र सो मागलाई अझ तीव्र बनाउनुपर्छ । जसले विघटन गर्छ, त्यसले नै पुनःस्थापना गर्नुपर्छ । कि त अदालतले गर्छ, होइन भने विघटन गर्ने राष्ट्रपतिले गर्नुपर्छ । असंवैधानिक ढंगले विघटन गर्न सक्ने राष्ट्रपतिले पुनःस्थापना गर्न नसक्ने कसरी हुन्छ ? पुनःस्थापना गर्नै पर्छ नि । विघटन गर्ने राष्ट्रपतिले नै पुनःस्थापना गर्नुपर्छ । यस विषयमा हामी लेख्न, बोल्न र सत्यको पक्षमा उभिन सक्नुपर्छ ।’
अध्यक्ष ओलीले प्रतिनिधि सभा पुनःस्थापनाको मागसहित आन्दोलनमा उत्रिन सबैलाई आह्वान गरे । उनले वर्तमान सरकार असंवैधानिक भएकाले यसको कुनै हैसियत नभएको पनि दोहोर्याए ।
