काठमाडौँ — मंसिरभित्रै नियमित महाधिवेशन गराउन दबाब दिँदै कांग्रेस नेता शेखर कोइरालानिकट युवाहरुले बिहीबार भेला गरेका छन् । भेलामा संस्थापनपक्षीय नेता तथा कार्यकर्ताहरुको समेत उपस्थिति रहेको थियो । 

बत्तीसपुतलीस्थित अनुपम फुडल्यान्डमा आयोजना गरिएको भेलाको अध्यक्षता नै संस्थपनपक्ष निकट भक्तपुर जिल्ला सभापति दुर्लभ थापाले गरेका थिए । भेलामा महामन्त्री कृष्णप्रसाद सिटौला निकट कोशी प्रदेश कार्यसमितिका सभापति उद्धव थापाले समेत धारणा राखेका थिए । थापा तिनै व्यक्ति हुन्, जसले केन्द्रीय कार्यसमिति बैठकमा निर्वाचन अगाडि कुनै पनि हालतमा महाधिवेशन असंभव रहेको धारणा राखेका थिए । 

शेखर निकट युवा नेता दीपक भट्टराईले आफूहरुले आयोजना गरेको कार्यक्रममा संस्थापनपक्षले समेत समर्थन जनाएर उपस्थित भएको बताए । ‘हाम्रो स्पष्ट माग मंसिरभित्रै नियमित महाधिवेशन हुनुपर्छ भन्ने अडान हो । त्यसमा दायाँ–बायाँ गर्दैनौं । यस मुद्दामा सहमत हुने सबै जोडिन सक्नुहुन्छ,’ उनले भने,‘मंसिरभित्रै नियमित महाधिवेशन भएन भने कार्यकाल सकिएको दिनमा केन्द्रीय कार्यसमितिमा भंग गरिनुपर्छ भन्ने हाम्रो अर्को माग हो ।’