काठमाडौँ — नेपाली कम्युनिस्ट पार्टीले निर्वाचन आयोगमा दल दर्ताको निवेदन दिएको छ।  

विभिन्न १० वटा वाम दल र समूह मिलेर बनेको पार्टीले एकता घोषणा गरेपछि आयोगमा दल दर्ताको निवेदन आएको आयोगका प्रवक्ता नारायण प्रसाद भट्टराईले जानकारी दिए ।

निवेदन प्रक्रियामा रहेको र छलफल पछि निर्णय हुने उनले जानकारी दिए । नेकपा माओवादी केन्द्र, नेकपा एकीकृत समाजवादी सहितका दलहरूले नेपाली कम्युनिस्ट पार्टी बनाएका हुन् ।

नवगठित पार्टीको चुनाव चिह्न पाँचकुने तारा राखिएको छ । नेपाली कम्युनिस्ट पार्टीका नेता लिलामणि पोखरेलले यसअघि दर्ता भएका नेकपा माओवादी केन्द्र, एकीकृत समाजवादी, नेकपा समाजवादी, जनसमाजवादी खारेज गरी नयाँ दल दर्ताका लागि निवेदन दिएको जानकारी दिए ।