काठमाडौँ — एमालेले ‘युथ भोलिन्टियर फोर्स’ बनाएको छ । नेकपा (एमाले) जनसंगठन समन्वय संयन्त्रले भक्तपुरको गुण्डुमा आज आयोजना गरिएको युथ भोलिन्टियर फोर्स भेला कार्यक्रममा जनसंगठन प्रमुख भानुभक्त ढकालले महेश बस्नेतको नेतृत्वमा ९ सदस्यीय कार्यदल घोषणा गरेका छन् ।

शनिबार गुण्डुमा बसेको पार्टी सचिवालयको बैठकले निर्णय गरेपछि आज उक्त कार्यदल घोषणा गरिएको जनसंगठन प्रमुख ढकालले बताए ।

कार्यदलमा महेश बस्नेत (संयोजक) सहित पुष्प श्रेष्ठ, वचन देउजा, समिक बराल, मिनबहादुर शाही, विनिता काफ्ले, निशा लिम्बू, बिनोद पाण्डे र महेश चौलागाँई रहेका छन् । पार्टीका विभिन्न विभागीय संगठनमा रहेकाहरूलाई समेत समेटेर स्वयम्सेवा दस्ता गठन गरिएको र आगामी मंसिर ५ गतेभित्र यसको कार्यक्षेत्र, कार्यसमिति र कार्यविभाजनसहित ‘राष्ट्रिय युवा स्वयम्सेवा दस्ता’ विधिवत रूपमा गठन गरिएको घोषणा गरिने ढकालले बताए ।

उनका अनुसार युवा स्वयम्सेवा दस्ताले पार्टी र जनताको सेवामा खटिने, पुनर्निर्माण तथा विपद्‌मा परेकाहरूको उद्धार कार्यमा समेत सहभागी हुनेछ । नेकपा (एमाले) सरकारमा बढी सहभागी भएपछि जनस्तरको सुरक्षाभन्दा पनि राजकीय सुरक्षामा भर पर्न थालेको बताउँदै उनले पार्टीभित्र स्वयम्सेवी निष्ठा र इमान हराउँदै गएकाले राष्ट्रिय युवा स्वयम्सेवा दस्ता गठन गर्नुपर्ने आवश्यकता देखिएको स्पष्ट पारे ।

सबै जनवर्गीय संगठनका सदस्यहरू पनि ‘युथ फोर्स’ मा सहभागी हुन सक्ने उनको भनाइ छ । ‘युथ भोलिन्टियर फोर्स’ प्रस्तावित नाम भएको र यसले विधान बनाएर आगामी मंसिर ५ गते विधिपूर्वक कार्यक्रमदेखि नेतृत्वसम्मको घोषणा गर्ने उद्देश्यले आज कमिटी गठन गरिएको उनले जानकारी दिए ।