काठमाडौँ — कांग्रेसका महामन्त्री विश्वप्रकाश शर्माले पार्टीको १५ औं महाधिवेशन निर्वाचन अगाडि कि पछाडि गर्ने भन्ने सन्बन्धमा महासमिति सदस्यहरुको ‘भोटिङ’ लिन प्रस्ताव गरेका छन् ।

कार्यवाहक सभापति पूर्णबहादुर खड्काले शनिबार राखेको पदाधिकारी बैठकमा शर्माले पुस १७ गते बीपी कोइरालाले मेलमिलाप दिवस पारेर स्वदेश फर्केको अवसरमा उद्घाटन गर्ने गरी महाधिवेशन सम्पन्न गर्न प्रस्ताव अघि सारेका थिए ।

शर्माले दुई दिनअघि नै सार्वजनिक गरेको चार विकल्पका प्रस्तावमध्ये पुस १६–१९ को नियमित महाधिवेशनको विकल्प एउटा थियो । शनिबार यही विकल्पमा छलफल भएको थियो ।

केन्द्रीय कार्यसमितिको बहुमतका आडमा संस्थापन पक्षले महाधिवेशन निर्वाचन पछाडि धकेल्न खोजिरहेका बेला शर्माले निकासका लागि अर्को विकल्पमा महासमिति सदस्यको ‘भोटिङ’को प्रस्ताव गरेका थिए । यसले संस्थापन पक्षलाई थप दबाब बढाउँदै लगेको छ । कांग्रेसमा महाधिवेशनपछिको पार्टीको सर्वोच्च निकाय महासमिति हो ।

‘निर्वाचन अगाडि कि पछाडि भन्नेमा हामीले १२ घण्टाका बीचमा डिजिटल भोटिङ गर्न सकिन्छ । डिस्कर्डमा चिनिएका, नचिनिएका जोसुकै आएर देशको प्रधानमन्त्री छान्न सकिन्छ भने कांग्रेसको महासमिति सदस्यहरुको भोटिङ लिन नसकिने भन्ने हुन्न,’ शर्माले भने,‘भोटिङबाट बहुमत जुनको पक्षमा हुन्छ, त्यसैमा जान सकिन्छ ।’