काठमाडौँ — एमाले केन्द्रीय कमिटी बैठकमा भदौ २३ मा नानीबाबुहरूको हत्याको जिम्मेवारी कसले लिने भन्ने प्रश्न उठेको छ। अध्यक्ष केपी शर्मा ओलीले त्यस दिन गोली चलाउने आदेश दिने प्राधिकार आफू नभएको दाबी गरिरहेका बेला उनीमाथि प्रश्न उठेको हो। शुक्रबारको बैठकमा केन्द्रीय सदस्य उषाकिरण तिम्सिनाले नानीबाबुहरूको हत्याको जिम्मेवारी कसले लिने भन्ने प्रश्न गरेकी हुन्।

‘विध्वंस, विनाश र वियोगान्त पछिको केन्द्रीय कमिटीमा छौँ, तर यहाँ त हामी नेतृत्वका प्रमुख व्यक्तिहरू सफल छन् भनिरहेका छौँ।अहिले असफल भएको चाहिँ को हो? अस्ति भर्खर स–साना नानीहरूको कत्लेआम भयो । खर्बौंको सार्वजनिक र निजी सम्पत्तिमा आगलागी भयो। ती सबैको नैतिक जिम्मा कसले लिने हो?,’ उनले बैठकमा प्रश्न गरिन्, ‘गोली हान्ने प्रहरीको हवलदारले लिने हो कि प्रहरीलाई भागीदार बनाउने हो ? वा यसको नैतिक जिम्मेवार तत्कालको प्राधिकारको हुन्छ कमरेड ?’

उनले ओली अध्यक्ष भएको एक दशक भए पनि नेपालको कम्युनिस्ट आन्दोलनमा भएको क्षतिको लेखाजोखा गर्नुपर्ने बताए । ‘कमरेड ओली यो पार्टीको अध्यक्ष हुनु भएको ११ वर्ष भयो । यो ११ वर्षमा भएका अभ्यासहरूले हामीलाई, बाम आन्दोलन र सिङ्गो कम्युनिस्ट आन्दोलनलाई कता पुर्‍यायो ?’ तिम्सिनाले प्रश्न थियो, ‘नेकपा गठन एउटा महत्त्वपूर्ण कडी थियो। तर त्यसलाई हामीले कस्ता– कस्ता अभ्यास र कस्ता ध्वंसकारी अभ्यास गर्‍यौँ ?’

उनले जेन-जी आन्दोलनपछि परीक्षण भइसकेको युवा पुस्ताले बिदा लिनुपर्ने बताइन् । ‘यो जेन-जी आन्दोलनको एउटा जबर्जस्त माग पार्टीका टेस्टेड नेतृत्व र पुस्ताले  बिदा लेऊ भन्ने नै हो। त्यसलाई अनदेखा गर्न अब सकिन्न,’ तिम्सिनाले भनिन्, 'एमालेको पुनर्गठन महत्त्वपूर्ण छ । कांग्रेसमा त्यो सुरु भइसक्यो। अब अध्यक्षले राजीनामा गरेर मुलुकको राजनीतिक गतिरोधको ढोका खोल्नुपर्छ ।’ उनले पार्टीको यही संरचना लिएर चुनाव वा आन्दोलनमा जान नसकिने बताइन्।

बैठकमा बोल्दै नेता ठाकुर गैरेले नेतृत्व हस्तान्तरण गर्नुपर्ने बताए । ‘बाम एकता गरेर निर्माण गरेको सरकार पनि ढल्यो । बाम – लोकतान्त्रिक सरकार पनि ढल्यो । यस्तो समयमा पार्टी रुपान्तरणको मुद्दालाई नेतृत्वको बिरोधको रुपमा बुझ्न ह्न्नु,' उनले थपे, ‘म यो बैठकलाई नेतृत्व हस्तान्तरण गरेर जाऔं भन्ने अनुरोध गर्दछु ।’

अर्का केन्द्रीय सदस्य ईश्वरी घर्तीले पार्टीको आसन्न एघारौं महाधिवेशनमा जेन-जी पुस्तासहित युवाको प्रतिनिधित्वलाई सुनिश्चित गर्न प्रतिनिधि छनौट गर्नुपर्ने बताइन् । ‘महाधिवेशनबाट नयाँ महाधिवेशनमा जेन-जी पुस्तासहित युवाको प्रतिनिधित्वलाई सुनिश्चित गर्नुपर्छ,' उनले भनिन्, 'पार्टीमा टिके प्रथाले पार्टी पुनर्गठन र सुदृढीकरण हुन सक्दैन, झन् कमजोर हुन्छ भन्ने कुरा बुझौं ।’