काठमाडौँ — एमाले अध्यक्ष केपी शर्मा ओलीलाई नेतृत्व हस्तान्तरण गर्न दबाब परेको छ । जेन–जी आन्दोलनपछि दलहरूमा नेतृत्व हस्तान्तरणको दबाब बढिरहेका बेला ओलीले पनि पद छाड्नुपर्ने माग एमाले नेताहरूले गरेका हुन् । एमालेको कात्तिक पहिलो साता बस्ने केन्द्रीय कमिटी बैठकले महाधिवेशनबारे निर्णय गर्ने तयारी गरेको छ । 

भक्तपुरको गुन्डुमा शुक्रबार बसेको सचिवालय बैठकमा नेताहरूले छिट्टै महाधिवेशन गरी नेतृत्व हस्तान्तरण गर्नुपर्ने र यसका लागि ओली तयार हुनुपर्ने जनाएका थिए । बैठकमा वरिष्ठ उपाध्यक्ष ईश्वर पोखरेल, उपाध्यक्षहरू युवराज ज्ञवाली, अष्टलक्ष्मी शाक्य, सुरेन्द्र पाण्डेले आगामी महाधिवेशनबाट नेतृत्व हस्तान्तरण गर्नुपर्ने माग गरे । उपाध्यक्षद्वय विष्णु पौडेल र रामबहादुर थापाले पनि जेन–जी आन्दोलनपछि पार्टी नेतृत्वप्रति नैतिक प्रश्न उठेकाले नयाँ ढंगले सोच्नुपर्ने धारणा राखेका थिए । 

वरिष्ठ उपाध्यक्ष पोखरेलले बदलिँदो अवस्थामा पार्टीलाई नयाँ ढंगले अघि बढाउन आवश्यक सबै क्षेत्रमा पुनर्गठन गर्नुपर्ने बताए । ‘पार्टीलाई नयाँ ढंगले अघि बढाउनुपर्छ । नयाँ राजनीतिक परिस्थितिमा नेतृत्व पुनर्गठनको विषय छलफल गरेर टुंगोमा पुग्नुपर्छ,’ उनले बैठकमा भनेका थिए, ‘परिस्थिति नयाँ बन्यो, पुरानो सोचाइले अघि बढ्न सकिँदैन । हिजोको निर्णयले काम गर्न सक्दैन ।’ विचार, नेतृत्व, कार्यशैली पुनर्गठन गरेर मात्र पार्टी बलियो बनाउन सकिने उनले बताएका थिए । 

उपाध्यक्षद्वय युवराज ज्ञवाली र अष्टलक्ष्मी शाक्यले लिखित धारणा राख्दै ७० वर्ष पुगेका नेताले विधिवत् रूपमा नेतृत्व छाड्नुपर्ने प्रस्ताव राखेका छन् । यस्तै, सामाजिक सञ्जाल बन्द गर्दा भएको प्रदर्शनमा तत्कालीन सरकारले युवालाई गोली चलाएर गम्भीर कमजोरी गरेको विषय पनि बैठकमा उठेको थियो । सोही कारण एमालेले सरकार छाड्नुपर्ने अवस्था आएकाले त्यसप्रति नेतृत्वले आत्मालोचना गर्दै नेतृत्व हस्तान्तरण गर्नुपर्ने नेताहरूको माग छ । 

‘आवश्यकता र बानी बनिसकेको सामाजिक सञ्जाल अचानक बन्द भयो । जनतामा असन्तुष्टि पैदा भयो । सडकमा आएका युवाको प्रहरीको गोलीबाट हत्या भयो’ उपाध्यक्ष ज्ञवालीले भने, ‘यसमा सरकार असफल भयो । आत्मालोचना गर्नुपर्‍यो । प्रधानमन्त्रीले छाड्नुपर्‍यो । त्यसपछि पार्टी नेतृत्वप्रति प्रश्न उठेको छ । पुराना नेताले बिदा लिनुपर्छ भनेर आवाज उठिसक्यो ।’

उपाध्यक्ष शाक्यले पार्टीभित्र र बाहिर नेतृत्व परिवर्तनको आवाज उठेकाले निकास निकाल्नुपर्ने बताइन् । ‘नेतृत्वको सम्मानपूर्वक बहिर्गमन हुनुपर्छ । पार्टीभित्रबाट सहज निकास दिनुपर्छ’ शाक्यको भनाइ थियो । विगतमा ओलीको पक्षमा उभिएका उपाध्यक्ष पौडेलले राजनीतिक परिस्थिति बदलिएको अवस्थामा पार्टी, नेतृत्व र संगठन पुनर्गठन गर्नुपर्ने बताएको एक नेताले बताए । ‘अब पार्टी पुनर्गठन गरेर मात्र समस्या समाधान गर्न सकिन्छ’ उनको भनाइ थियो ।

उपाध्यक्ष पाण्डेले एमालेले सरकारको नेतृत्व गरिरहेका बेला जेन–जी आन्दोलनको बलमा सत्ता छाड्नुपर्ने विषयको गम्भीर समीक्षा गर्नुपर्ने बताए । सरकार र पार्टी नेतृत्वबाट भएका कमीकमजोरी स्वीकार गर्दै पुनर्गठनको बाटोमा अघि बढ्नुपर्ने उनको भनाइ थियो ।

उपाध्यक्ष गुरु बराल, महासचिव शंकर पोखरेल र उपमहासचिव प्रदीप ज्ञवाली भने संकटका बेला नेतृत्वको रक्षा गर्नुपर्ने भन्दै ओलीको पक्षमा उभिएका थिए । बैठकपछि उपमहासचिव ज्ञवालीले महाधिवेशनले नेतृत्व र पुस्तान्तरणका विषयमा टुंगो लगाउने बताए । ‘बिस्तारै नेतृत्व हस्तान्तरण र पुस्तान्तरणको बाटोमा अघि बढ्नुपर्छ भन्ने कतिपय साथीको आवाज छ । त्यसलाई ध्यान दिएका छौं,’ उनले भने, ‘हामीले वर्षौं लगाएर स्थापना गरेको लिगेसी रक्षा गर्नुपर्नेछ । संकटका बेलामा नेतृत्वको प्रतिरक्षा गर्नुपर्नेछ भने जनता, पार्टी कार्यकर्ताको भावना समेट्नुपर्नेछ । महाधिवेशनसम्म पुग्दा यी सबै विषय सम्बोधन गर्नेछौं ।’

बैठकको सुरुमै ओलीले पार्टीलाई संकटबाट अघि बढाउन अझै आफ्नो आवश्यकता भएको धारणा राखेका थिए । यो भनाइले पनि ओली अझै नेतृत्व छाड्ने मनस्थितिमा पुगेका छैनन् भन्ने स्पष्ट पारेको छ । उनले स्वास्थ्यले साथ दिँदासम्म नेतृत्व नछाड्ने बताउँदै आएका छन् । शनिबार ओली अस्वस्थ भएका कारण सचिवालय बैठक स्थगित भएको छ ।