शर्माले २६ असोजको केन्द्रीय समिति बैठकअघि नै हस्ताक्षर बुझाउने योजनालाई समर्थन गर्दै २४ असोजभित्र हस्ताक्षर गर्न ढिलाइ नगर्न आग्रह गरे। पार्टी विधानको दफा १७ (२) अनुसार केन्द्रीय समितिले विशेष महाधिवेशन बोलाउन सक्ने र यो विषयमा बैठकमा छलफल हुने उनले उल्लेख गरे।
काठमाडौँ — कांग्रेसका महामन्त्री विश्वप्रकाश शर्माले महाधिवेशन प्रतिनिधिहरूलाई विशेष महाधिवेशनका लागि हस्ताक्षर गर्न सुझाएका छन्। तर कसैलाई दबाब नदिएको उनले बताएका छन् ।
विशेष महाधिवेशन विधान विपरीत नभएको र परिपक्व ढंगले प्रयोग गर्दा पार्टी कमजोर नहुने उनको भनाइ छ। मानव शरीरको अपरेसनसँग तुलना गर्दै उनले सफल महाधिवेशनले पार्टीलाई बलियो बनाउने बताए।
शर्माले २६ असोजको केन्द्रीय समिति बैठकअघि नै हस्ताक्षर बुझाउने योजनालाई समर्थन गर्दै २४ असोजभित्र हस्ताक्षर गर्न ढिलाइ नगर्न आग्रह गरे। पार्टी विधानको दफा १७ (२) अनुसार केन्द्रीय समितिले विशेष महाधिवेशन बोलाउन सक्ने र यो विषयमा बैठकमा छलफल हुने उनले उल्लेख गरे। यदि केन्द्रीय समितिले विशेष महाधिवेशन नबोलाए ४० प्रतिशत महाधिवेशन प्रतिनिधिको हस्ताक्षरले माग गर्न सकिने र यो विधानसम्मत हुने उनको भनाइ छ।
मंसिर मसान्तभित्र १५औँ नियमित महाधिवेशन गर्नु सर्वोत्तम बाटो भएको शर्माले बताए। यसले सबै तहमा ताजा नेतृत्व चयन हुने र विधान परिमार्जन गरी युवा सहभागिता बढाउन सकिने उनको धारणा छ। 'दुई–ढाई दिनको प्रदर्शनले सत्ता परिवर्तन गर्न सकिन्छ भने दुई–ढाई महिनामा महाधिवेशन किन सकिन्न?' भन्दै उनले यो सम्भव भएको उल्लेख गरे। यदि नियमित महाधिवेशन सम्भव नभए विशेष महाधिवेशनमा हस्ताक्षर गर्नेहरूलाई स्वागत गरिने उनले बताए।
शर्माले २६ असोजको बैठकमा परिपक्व छलफल गरी उपयुक्त निष्कर्षमा पुग्ने र बदलिएको समयअनुसार कांग्रेसलाई बलियो बनाउने संकल्प व्यक्त गरे। 'जो बदलिन्छन्, तिनले नेतृत्व लिन्छन्; जो बदलिन्नन्, तिनले बिदा लिन्छन्,' उनले भने।
