काठमाडौँ — नेकपा एकीकृत समाजवादीका अध्यक्ष माधवकुमार नेपालले मुलुकको सार्वभौमिकता, भूगोलको रक्षाका लागि आवश्यक सबैखाले पहलकदमी लिन सरकारलाई आग्रह गरेका छन् ।

पार्टीको चौथो स्थापना दिवसका अवसरमा आज विज्ञप्ति जारी गर्दै उनले देशको सार्वभौमिकता रक्षाका लागि सम्बन्धित पक्षलाई सबैको सहकार्य र समन्वयबाट दबाब दिनुपर्ने बताउँदै नेपाली भूगोलको सम्मान गर्न छिमेकी राष्ट्रहरूलाई समेत आह्वान गरे ।

मुलुकको सार्वभौमिकता र भूगोलको रक्षाका निम्ति आवश्यक सबैखाले पहलकदमी लिन सरकार लगायत सम्बन्धित सबै पक्षलाई दबाब दिनुपर्ने नेपालले उल्लेख गरेका छन् । 'ऐतिहासिक तथ्य र प्रमाणका आधारमा समेत नेपालकै रहेका भूभागहरु कालापानी, लिपुलेक र लिम्पियाधुरामाथि हाम्रो सार्वभौमितामा आँच पुग्ने गरी भारत र चीनबीच समझदारी भएको भनेर सञ्चारमाध्यममा समाचारहरु आइरहेका छन्,' उनले भनेका छन्, 'पार्टी पुनर्गठन दिवसको यस अवसरमा हामी मुलुकको सार्वभौमिकताको रक्षा गर्न पारस्परिक संवाद लगायत कुनै पनि कसर बाँकी नराख सरकारको गंभीर ध्यानाकर्षण गराउँदै नेपालको सार्वभौमिकता र भूगोलको सम्मान गर्न छिमेकी राष्ट्रहरुलाई समेत आव्हान गर्दछौं ।'

समाजवाद उन्मुख लोकतन्त्रलाई मजबुत पार्ने, समतामूलक समाज निर्माण गर्ने र गरिब, किसान तथा उत्पीडित वर्गको अधिकारलाई संस्थागत गर्ने सङ्कल्प गर्नुपर्ने बताउँदै उनले कम्युनिष्ट आन्दोलनभित्र देखिएका विचलनलाई अन्त्य गरी आन्दोलनलाई शुद्धीकरण तथा एकीकरण गर्नुपर्ने उल्लेख गरे ।

पूर्वप्रधानमन्त्रीसमेत रहेका अध्यक्ष नेपालले राष्ट्रिय स्वाधीनता सुदृढ गर्दै जनताको आधारभूत अधिकार तथा आवश्यकतालाई सुनिश्चित गर्नुपर्नेमा जोड दिएका छन् । राष्ट्रिय स्वतन्त्रता, लोकतान्त्रिक अधिकार र जनजीविकाको प्रश्नलाई प्रमुख ‘एजेन्डा’ बनाउँदै आएको एकीकृत समाजवादीले राष्ट्रियता, लोकतन्त्र र सामाजिक न्यायलाई आफ्नो आधार मानेर श्रमिक–किसान, दलित, महिला, उत्पीडित तथा अवसरबाट वञ्चित वर्गको हितमा दृढतापूर्वक अघि बढ्ने उनले प्रतिबद्धता व्यक्त गरे ।