साढे आठ बजे पिकअपमा नौमती बजाउँदै बाजागाजाको टोली चापागाईँको घर आइपुग्यो । तिनको स्वागतपश्चात् खाना खुवाएपछि झन्डै ५० जनाको समूह बेँसी तिर लाग्यो । अघिअघि नौमती बाजा बजाउने,पछि पछि नाचगान गर्दै हिँडिरहेका स्थानीयको उत्साह निकै रोमाञ्चक देखिन्थ्यो ।

आधा घण्टाको पैदल यात्रापछि टोली फिदिम-५ को मताने बेँसी पुगेर रोकियो ।

खेतमा ४ हल गोरु नारिए । ब्याडेहरु बीउ काढ्न त बाउसेहरु हिलो आली गर्न थाले ।

९६ वर्षीय पदमप्रसाद चापागाईँले सिमे भूमे र देवी देवता पुकारेर धानको बीउ चढाए पश्चात रोपाइँ सुरु भयो ।

नौमती टोली बाजा बजाउने, बाउसे हिलो आली गर्ने ब्याडेहरु बीउ काढेर गह्रामा हुत्याउने, अनि फ्याउरी र दाँते लगाउने रोपाहारसँग हिलो छ्यापाछ्याप गर्दै रमाउने दृश्यहरू झनै रोमाञ्चक थिए ।

क्षणभरमै रमितेहरुले खाली भएका खेतका कान्ला र भित्ता भरिए । अपराह्न साढे दुई बजे आयोजकले भेला भएका सबैलाई दुना टपरीमा खाजा स्वरूप दोपहर बाँडे । खाजापछि पुनः खेतका गह्रा बाउसे र रोपाहार र हलि कोदालेले भरिए । यो क्रम साँझसम्म निरन्तर चल्यो ।

पदमप्रसादका अनुसार फिदिम १,२,३,४र ५ नम्बरका खेतमा २०५२ सालपछि बेठी लागेको थिएन ।  माओवादीको 'सशस्त्र विद्रोह'पछि जिल्लाका अरू कुनै पनि बेँसीमा बेठी लाग्न छोडेको थियो ।

‘२०५२ सालपछि परम्परालाई निरन्तरता दिन बेठी लगाउने योजना बनाएर २ वर्ष अघि (२०८१ सालमा) बेठी लगाइयो, गत वर्ष निरन्तरता दिन नसके पनि यो वर्ष भने रमाइलो भयो,’ पदमप्रसादले भने ।

युवा पुस्ताले गाउँ छोड्दै गए,जनशक्ति अभाव हुन थाल्यो, खेतीयोग्य जमिन बाँझिन थाले, बेठी लगाउनकै लागि कुम्मायक गाउँपालिका-३ हात्ती पोखरीबाट पारिश्रमिक दिएर नौमती टोली बोलाइएको थियो । परम्परा मासिएला कि भनेर यसो गरिएको उनी सुनाँउछन् । 

चापागाईँको बेँसीमा नौमती बाजासँगै ४ हल गोरु,३९ रोपाहार,३२ बाउसे र ७ जना ब्याडे खटिएका थिए । 

रोपाहार र ब्याडेहरुले भाका फेरि फेरि असारे गीत गुन्जाउनुका साथै धित मर्नेगरी हिलो छ्यापाछ्याप गर्दै मनोरञ्जन लिए । बेठी लाग्दा रमिता हेर्न ज्येष्ठ नागरिक, प्रौढ, युवासँगै केटाकेटी पनि उत्साहित देखिन्थे ।

यहाँ भेला भएका युवा पुस्ताका अधिकांशले पहिलो पटक बेठी हेरेको सुनाए । ‘आज बेठीमा प्रत्यक्ष सहभागी भएर रमाइलो गरियो यसले सामाजिक, सांस्कृतिक सद्भाव कायम गर्न मदत पुर्‍याएको महसुस भयो,’ फिदिम-२ का देवेन्द्र बाँस्कोटाले भने ।

बेठी हेर्न फिदिम आसपासका सर्वसाधारण सँगै स्थानीय तहका जनप्रतिनिधिको पनि बाक्लो उपस्थिति थियो ।

फिदिम नगरपालिकाका मेयर मित्रप्रसाद काफ्लेले बेठीले लोप हुनै लागेको संस्कृति संरक्षणसँगै नयाँ पुस्तालाई संस्कार र संस्कृतिबारे जानकारी दिन भूमिका खेलेको टिप्पणी गरे । गोरु जोत्दै नौमती बाजा बजाएर रोपाई गर्दा धान उत्पादन वृद्धि हुने विश्वास आयोजकको छ ।