चन्द्रनिगाहपुर आइपुग्यो मिटरब्याज पीडितको पैदल मार्च
जनकपुरबाट २५ असारमा सुरु भएको मिटरब्याज पीडितहरुको ‘न्याय मार्च’ सोमबार पाँचौ दिनमा प्रवेश गरेको हो । झरीका कारण उनीहरुको यात्रामा समस्या आएको छ ।अधिकांश भिज्दै हिडेका छन् ।
शोषण र अत्याचारविरुद्ध न्याय माग्दै न्यायको खोजीमा जनकपुरबाट सुरु भएको मिटरब्याजविरुद्धको पैदल मार्चमा सहभागीहरू सोमबार चन्द्रनिगाहपुर आईपुगेका छन् । २५ असारमा सुरु भएको यात्रामा सहभागीहरू लगातारको वर्षा र प्रशासनिक चुनौतीका बाबजुद काठमाडौंतर्फ दृढतापूर्वक अघि बढिरहेका छन् । आइतबार राति चन्द्रनिगाहपुरस्थित धर्मशालामा बसेका उनीहरू बिहानै काठमाडौंतर्फ लागेका हुन् ।
उनीहरूलाई भेट्न पुगेको जिल्ला प्रहरी प्रमुख सिताराम रिजालसहितको सुरक्षा निकायको टोलीले वर्षा र बाटोमा आउन सक्ने प्राकृतिक जोखिम (बाढी, पहिरो)लाई मध्यनजर गर्दै यात्रा अगाडि नबढाउन र मौसम अनुकूल भएपछि मात्र सुरु गर्न अनुरोध गरेको थियो ।तर, आन्दोलनकारीहरुले प्रहरीको आग्रहलाई अस्वीकार गरेका थिए ।
'वर्षौंदेखि मिटरब्याजको चक्रब्यूहमा फसेर घरबारविहीन हुने अवस्थामा पुगेका पीडितहरूले मौसमको प्रतिकूलताभन्दा न्यायको लडाइ ठूलो भएको अडान राखे ।'घामपानी र बाटोको जोखिम त केही दिनको मात्र हो तर मिटरब्याजीले दिएको पीडाले हामी जुनीभरि रोएका छौ,’ गरुडा–७ भिमडावर गाउँका ६२ वर्षीय भागवत लालले भने, ‘मलाई सडकमै बास बनाईदियो । अन्यायको पराकाष्ठ नाघेर महाजनले जग्गा समेत खाईदियो । न्यायको लागी सरकारको आखा खोल्न काठमाडौ जादै छु ।’
राज्यको ध्यान आफूहरुको बाँकी समस्या समाधानतर्फ जाओस् भन्नका लागि उनीहरू वर्षातको समयमा पनि सडकमा ओर्लिन बाध्य भएका हुन् । पैदलयात्रामा सहभागी अधिकाश चप्प्ल र केही खाली खुट्टा हिँडेका छन् । उनीहरू प्रत्येक दिन करिब २० किलोमिटर पैदल यात्रा गर्दै काठमाडौंतर्फ अगाडि बढिरहेका छन् ।
जनकपुरबाट सुरु भएको मिटरब्याज पीडितहरुको ‘न्याय मार्च’ सोमबार पाँचौ दिनमा प्रवेश गरेको हो ।झरीका कारण उनीहरुको यात्रामा समस्या आएको छ ।अधिकांश भिज्दै हिडेका छन् ।
शिव उनी कान्तिपुरका संवाददाता हुन् । रौतहटलाई केन्द्र बनाएर उनले मधेश प्रदेशको राजनीति, सामाजिक र आर्थिक विषयमा रिपोर्टिङ गर्छन् ।
