यसलाई तीन चरणमा ठेक्का गरी काम अघि बढाइएको पूर्वाधार विकास मन्त्रालयअन्तर्गको संघीय सचिवालय निर्माण तथा व्यवस्थापन कार्यालयले जनाएको छ । पहिलो चरणमा ११ र दोस्रो चरणमा १६ वटा भवनको पुनर्निर्माण अघि बढाइएको छ । तेस्रो चरणमा फर्निसिङको ठेक्का गरिएको छ । यसका लागि पहिला भवनको काम सकिसक्नुपर्नेछ ।

पुनर्निर्माणको काम असार मसान्तसम्म सकिसक्नुपर्ने भएकाले त्यहीअनुसार काम भइरहेको संघीय सचिवालय निर्माण तथा व्यवस्थापन कार्यालयका इन्जिनियर एवं सूचना अधिकारी अरुण भुजेलले बताए । जुन भवनको काम सकिन्छ, त्यही भवनमा फर्निसिङको काम थालिनेछ । ‘२७ वटै भवनको काम एकैचोटि सक्नेभन्दा पनि सकिएका भवनमा क्रमशः मन्त्रीलाई बसोबासको व्यवस्थापन गर्दै लग्छौं,’ उनले भने, ‘पुनर्निर्माण सकिने भवनमा फर्निसिङको काम थाल्छौं ।’

अहिले क्षति नभएको भवनमा पूर्वाधार विकासमन्त्री सुनिल लम्साल मात्र बस्दै आएका छन् । ६ जना मन्त्री पुल्चोकको पुरानो मन्त्री आवासमा छन् । जहाँको मन्त्री आवास भैंसेपाटी सरेपछि न्यायाधीशहरूलाई बसोबासको व्यवस्था गरिएको हो ।