फेदीका विभिन्न भीरमा उधौलीको बेला असोज–कात्तिकमा र उभौलीका बेला वैशाख–जेठमा मह सिकार गर्ने परम्परा रहेको मह सिकारीमध्येका मुख्य माखाम्लाका हस्तराम राईले बताए । महोत्सव सुरु भएको दिन शुक्रबार प्रतिकूल मौसमका कारण मह सिकार गर्न नसकिएपछि शनिबार बिहानैदेखि मह सिकार गरिएको हो । यसवर्ष तेहरा भीरमा रहेका ११ मध्ये ९ गोलाको मह सिकार गरिएको छ । गत वर्षको तुलनामा यो वर्ष कम गोला लगाएको मह सिकारी धनकुमार राईले बताए । उनका अनुसार गत वर्ष यहाँ १७ वटा गोला लगाएको थियो ।

मह सिकारका लागि चोयाको पर्‍याङ (भर्‍याङ)को माध्यमबाट भीरमा चढेर दाबिलो (मह काट्ने चक्कु)ले चाका काटेर डोरीको माध्यमबाट डालोमा राख्ने गरिन्छ । मह डालोमा राखेपछि डोरीकै माध्यमबाट भुइँमा खसालिन्छ । त्यसपछि बाँसको छपनीमा मह छानेर बोतलमा भर्ने गरिन्छ । भीर माहुरीको महमा औषधीय गुणयुक्त हुने हुँदा महंगोमा बिक्री हुने गरेको धनकुमारले बताए । उनका अनुसार प्रतिसेर (प्रतिकिलो) २ हजार रूपैयाँमा बिक्री हुने गरेको छ । यो क्षेत्र मुन्दुम ट्रेलमा पर्ने भएकाले थप पर्यटन प्रबर्द्धन गर्ने उद्देश्यले महोत्सव आयोजना गरिएको केपिलासगढी गाउँपालिका अध्यक्ष समीर राईले बताए ।

यो क्षेत्र मनोरम भएकाले यसको संरक्षणका साथै हनी हन्टिङ पर्यटन पबद्र्धनका लागि थप प्रचार–प्रसारमा जोड दिनुपर्ने मैयु टेम्के साल्पा सिलिचुङ पर्यटन प्रबर्द्धन केन्द्रका अध्यक्ष रमेशकुमार राईले बताए । यसका साथै हनी हन्टिङ गर्दा सिकारीको सुरक्षाका लागि उपकरणको व्यवस्था गर्नुपर्ने, बाटो अप्ठेरो भएकाले त्यसको मर्मतको व्यवस्था गर्नु पर्ने राईले बताए ।

महोत्सवमा खोटाङसहित भोजपुर, ओखलढुंगा, झापा, मोरङ, सुनसरीलगायत विभिन्न जिल्लाबाट समेत आएको केपिलासगढी गाउँपालिकाका प्रमुख प्रशासकीय अधिकृत सौधन राईले बताए । उक्त महोत्सवमा रैथाने परिकार समेत राखिएको थियो । चौरीको घिउ, छुर्पी, विभिन्न खालका अचार, सेल रोटी, मकै भटमास, आलुबाट बनाएका परिकार, भेडा, रैथाने सुगुर, कुखुरालगायतका मासुजन्य परिकार समेत महोत्सवमा राखिएको थियो ।

कोशी प्रदेशको पदमार्गमा आधारित परियोजना शीर्षकमा सशर्त कार्यक्रम अन्तरगत ३ लाख ३६ रूपैयाँ बजेटमा महोत्सव आयोजना गरिएको सौधनले बताए । यसमध्ये पर्‍याङ बुन्न १ लाख, १० जना मह सिकारीलाई दुर्घटना विमा, स्वास्थ्य डेस्कका लागि आवश्यक सामग्री खरिद, कार्यक्रम व्यवस्थापन, अतिथि सत्कारलगायतमा खर्च गरिएको सौधनले जनाए । तस्बिरहरु: डम्बरसिं राई/कान्तिपुर