राईटोलका ३७ वर्षीय दानबहादुरका दुई दाजु भाइले १३ कट्ठामा चैते धान रोप्ने तयारी छ । बीउ काढ्नेदेखि मुठा खेतमा पुर्‍याउनेहरूको आलीमा ओहोरदोहोर देखिन्थ्यो । कोही रोप्न व्यस्त थिए । बकुल्लाको बथानै आलीमा आहारा ढुकेर बसेको थियो । अन्य चराहरू पनि चारो पाउने आशाले उड्दै बस्दै गरेका देखिन्थे । आडैमा चितवन राष्ट्रिय निकुञ्जको जंगलका रुखहरू नयाँ पालुवाले ढाकिएका थिए ।

राईटोलकै ६८ वर्षीय सोमबहादुर राई केही दिनअघि रोपेर सकेका कारण घर तिरै थिए । कतै धान रोपाइँ हुँदै गरेको थियो र कतै रोपेर भ्याएका गराहरूमा धान हरियो हुँदै गरेको थियो । कुलो लाग्ने भएका कारण पहिलेदेखि नै चैते धान रोप्दै आएको सोमबहादुरले सुनाए । भरतपुरका रहेको कृषि विकास कार्यालयबाट प्राप्त विवरण अनुसार चितवनमा कुल ९ हजार १९३ हेक्टरमा चैते धान हुन्छ ।

माडी नगरपालिकामा १ हजार ९६० हेक्टरमा चैते धान रोप्ने कार्यालयका अधिकृत निर्मल पौडेलले जानकारी दिए । चितवनको पूर्वी भेगमा चैते धान बढी रोप्ने चलन छ । चितवनमा कुल ५३ हजार ४१९ मेट्रिक टन चैते धान उत्पादन हुन्छ । कार्यालयका अनुसार वर्षे धान कुल २७ हजार ३२४ हेक्टरमा खेती हुने र एक लाख ३५ हजार ५७६ मेट्रिक टन उत्पादन हुन्छ । सबै तस्बिर : रमेशकुमार पौडेल/कान्तिपुर ।