यसैगरी रुकुम पूर्वका विभिन्न स्थानमा हिउँ पर्‍यो । बिहानसम्म सिस्ने, पुथा र चुरेन हिमालका साथसाथै यहाँका अग्ला पहाडी भेगहरू मैकोटदेखि बागलुङको सिमाना आसपासको क्षेत्र हिउँले ढाकियो ।

भूमे गाउँपालिका–१ पञ्चासेदेखि पाथीहाल्नेसम्मको मध्यपहाडी लोकमार्ग सडक खण्डमा बाक्लो हिउँ परेपछि शनिबार बिहानैदेखि दिउँसोसम्म सवारी आवागमन नै अवरुद्ध भयो । तर यही असहजताका बीचबाट पनि रुकुम पूर्व र बागलुङतर्फका सयौं मान्छेहरू हिउँमा रमाउन यहाँ पुगे । 

मौसममा आएको बदली र हिमपातका कारण लुम्बिनी प्रदेशको एकमात्र हिमाली जिल्ला रुकुम पूर्वका हिमाली र उच्च पहाडी भेगमा चिसो बढेपनी हिउँ परेकोमा किसानहरूले खुसी व्यक्त गरेका छन् । यसले हिउँदे बाली सप्रिने र पशुपक्षीको स्वास्थ्य पनि राम्रो हुने मैकोटका रामप्रसाद पुन मगरले बताए । ‘हिउँदमा कम्तीमा एकपल्ट त हिउँ पर्नैपर्छ । तबमात्रै माटोमा ओसिलोपना बढ्छ अनि धुलोमैलो पनि कम भएर वस्तुभाउलाई हित हुन्छ,’ उनले भने ।