थारू समुदायको मौलिक कला, संस्कृति, भेषभूषा र परम्पराको संरक्षण तथा प्रवर्द्धन गर्ने उद्देश्यले महोत्सव आयोजना गरिएको महोत्सव मूल आयोजक समितिका संयोजक तथा सभाका अध्यक्ष अशोक चौधरीले बताए ।

महोत्सवमा मघौटा, छोक्रा, हुर्डुङया, ढुम्री लगायतका विविध नाच प्रदर्शन गरिएको छ । 'आर्थिक जागरण व सांस्कृतिक रूपान्तरण हमार अभियान, सामाजिक न्यायसहित के समृद्धिम हमार योगदान' भन्ने मूल नाराका साथ महोत्सव आयोजना गरिएको छ । महोत्सवको उद्घाटन लुम्बिनी प्रदेशका मुख्यमन्त्री चेतनारायण आचार्यले गरेका छन् । महोत्सवमा पूर्वसांसद शान्ता चौधरी, घोराही उपमहानगरपालिका प्रमुख नरुलाल चौधरी लगायतको सहभागिता रहेको छ ।

महोत्सवमा थारू समुदायका मौलिक भेषभूषा र पहिचान झल्काउने ढक्या, डेल्वा, भौका, भौकी, हलो, जुवा लगायतका हस्तकलाका सामग्री सहित सहभागिता रहेको छ । थारू परिकारहरू घोंघी, माछा, गंगटा, ढिक्री, अनदीको रोटी, अनदीको भात, अनदीको झोल, आलुको अचार, सिध्रा माछा लगायतका खानेकुराको पनि आकर्षण छ ।

महोत्सवमा थारू इतिहास, भाषा, साहित्य र संस्कृतिसम्बन्धी पुस्तकहरूको प्रदर्शनी तथा बिक्री पनि गरिएको छ । यस्तै थारू समुदायका परम्परागत हस्तकला डेल्या, गुन्द्री, ढक्या, ढक्ली, ड्वाला, भौका, भौकी, बेर्रा आदिको प्रदर्शनी र बिक्री गरिएको छ ।