अन्तिम दिन हात्तीको पिकनिक, हात्तीको पूजा र हात्ती फुटबल (पेनाल्टी सुटआउट)को फाइनल प्रतिस्पर्धासँगै हात्ती महोत्सव समापन गरिएको हो । हात्ती फुटबल (पेनाल्टी सुटआउट)मा अन्य ५ वटा हात्तीलाई पछि पार्दै कसरा पर्यटन व्यवसायी समितिको लक्ष्मीकली प्रथम भइन् । तीन दिनमा ५ राउन्ड चलेको प्रतियोगितामा लक्ष्मीकलीले कुल १२ गोल गर्दै ७ पेनाल्टी बचाएपछि उपाधि जितेको हात्ती फुटबल प्रतियोगिताका संयोजक विनोद तिम्सिनाले जानकारी दिए । प्रतियोगितामा कुल १० गोल र ६ प्रहार बचाएकी क्षेत्रीय होटल संघ नेपालको बसन्तीकली ‘बी’ दोस्रो भइन् भने ९ गोल र ११ प्रहार बचाएकी सौराहा जीप तथा डुंगा बुकिङ सेन्टरको मारुतीकली तेस्रो भइन् । युनाइटेड हात्ती सञ्चालन सहकारीको चम्पाकली चौथो, रेस्टुरेन्ट एन्ड बार एसोसिएसनकी बसन्तीकली ‘ए’ पाचौं र निकुञ्ज सफारी प्रालिकी पुनमकली अन्तिम स्थानमा रहिन् । विजेताहरुलाई समापन समारोहमा पुरस्कार प्रदान गरिएको थियो । 

यस्तै, आइतबार नै हात्तीहरुलाई पिकनिक खुवाइएको छ । सौराहाका पर्यटन व्यवसायीले पालेका ३५ वटा हात्तीलाई पिकनिक खुवाइएको हो । उनीहरुलाई मिठो–मिठो परिकार स्याउ, सुन्तला, ड्रागन फ्रुट, भेली, कुची, उखु, पाउरोटीलगायतका परिकार खुवाइएको क्षेत्रीय होटल संघ सौराहा चितवनका अध्यक्ष ओम पाण्डेले जानकारी दिए । हात्तीको पिकनिक हेर्न दर्शकहरु झुमिएका थिए । 

त्यस्तै, आइतबार फाइनल प्रतिस्पर्धा सुरु गर्नुअघि तीन वटा हात्तीलाई राखेर पूजा गरिएको थियो । नेपाली परम्परा र संस्कृतिमा सबैभन्दा अगाडि गणेश भगवानको पूजा गर्ने प्रचलन रहेकाले महोत्सवको तालिका अनुसार नै यसपटक हात्तीलाई गणेशको रुपमा पूजा गरिएको हात्ती तथा पर्यटन महोत्सवका संयोजक गुणराज थपलियाले बताए । हात्तीलाई पूजा गरिसकेपछि पिकनिकमा खानका लागि हात्तीलाई निम्ता दिएर पिकनिक कार्यक्रम सुरु गरिएको उनले बताए । महोत्सव अन्तर्गत भएका डुंगा प्रतियोगिता, हात्ती सुन्दरी प्रतियोगिताका विजेताहरुलाई पनि आइतबार नै पुरस्कार प्रदान गरिएको थियो । 

क्षेत्रीय होटल संघ नेपाल चितवन सौराहाको आयोजना तथा युनाइटेड हात्ती सञ्चालन सहकारी संस्थाको सह–आयोजनामा बाघमारा मध्यवर्ती सामुदायिक वनको चौरमा पुस ११ गतेदेखि ३ दिनसम्म चलेको महोत्सवमा हात्तीको स्वास्थ्य शिविरसहित अन्य विविध सांस्कृतिक कार्यक्रम समेत गरिएको थियो । महोत्सवले सौराहामा पर्यटकको संख्यामा वृद्धि भएको छ ।