तानसेन नगरपालिका–३, टक्सारटोलको पुरानो बस्तीमा योमरीको प्रचारप्रसारका लागि महोत्सव आयोजना गरिएको मैत्री क्लबकी अध्यक्ष पञ्च शाक्यले बताइन् । महोत्सवले गैरनेवारको समेत ध्यान खिचेको थियो । थरीथरीका योमरीका साथै नेवारी परिकार देख्न, बनाएको हेर्न र खान पाइएको सहभागी तानसेन बारुदखानका लक्ष्मण रेग्मीले बताए ।

नेवारी भाषामा ‘यो’ भनेको मनपर्ने र ‘मरी’ भनेको रोटी हो । खासगरी नेवारी समुदायमा नयाँधान भित्र्याएपछि घरमा भकारी वा धन्सार बनाएर राख्ने गरिन्छ । मंसिर पूर्णिमाका अवसरमा आयोजित योमरी महोत्सवको छुट्टै महत्व रहेको छ । नेवार समुदायमा मंसिरमा धानको रोटी बनाएर परिवार, आफन्त, इष्टमित्रलाई बाँड्ने र आफूले पनि खाने परम्परा रहेको छ । नेवारहरुको पुरानो संस्कृतिलाई जोगाइराख्न र युवा पुस्तालाई पनि आकर्षण गराउन महोत्सव आयोजना गरिएको प्रचारप्रसार संयोजक रिलनमान महर्जनले बताए ।

महोत्सवमा नेवारी समुदायले बनाएका चाकु (भेली), योमरी, खुवा योमरी, मास योमरी, (कुखुरा, राँगा, च्याउ) छोइला पनि राखिएको थियो ।२० वटा स्टल रहेको महोत्सवमा उत्सुकताका साथ सहभागी भए । 'पछिल्लो पुस्तामा योमरी के हो ? यो कसरी बनाइन्छ भनेर थाहा नभएको पनि पाइएको छ । महोत्सवले प्रत्यक्ष सबैले देख्ने, हेर्ने र जानकारी दिएको छ,' वडाध्यक्ष बाबुरत्न शाक्यले बताए ।

महोत्सवमा विशेषगरी तीन किसिमको योमरी बनाएका थिए । गुलियो (चाकु र तिल) कुराउनी (खुवा) र मासको फरक स्वाद लिनेलाई मास र खुवाको बनाएको मैत्री क्लबकी पूर्वअध्यक्ष मनिता बज्राचार्यले बताइन् । नेवारी समुदायको संस्कृति बचाउन र नयाँ पुस्तालाई सिकाउनका लागि महोत्सव फलदायी बनेको आफूले पाएको तानसेन नगरपालिकाका नगरप्रमुख सन्तोषलाल श्रेष्ठले बताए । योमरी महोत्सव स्थानीयका साथै विदेशी पर्यटकलेसमेत अवलोकन गरेका थिए । मैत्री क्लबले महोत्सवमा आउनेका लागि नेवारी तथा अन्य विभिन्न समुदायको संस्कृतिमा आधारित सांस्कृतिक कार्यक्रमसमेत देखाएको थियो ।