नेपाली भिक्षुले थेरबाद परम्पराअनुसार पूजा गर्दै प्रार्थना गरेका थिए । त्यसपछि चिनियाँ, थाई, कोरियन र हिमालय परम्परा अनुसार धर्मगुरु र भिक्षु भिक्षुणीले शान्ति पाठ गरेका थिए ।

कार्यक्रमका प्रमुख अतिथि नेपाल–भारत थाई धम्मदूत एसोसिएसन उपाध्यक्ष फ्रा बोधीविदेश बजिराशुद्धीले महामानव बुद्धकै सन्देशले विश्व शान्ति सम्भव हुँदा सबैले अनुशरण गरेर हिंसारहित समाज बनाउन सके उनको सन्देश सार्थक हुने बताए । उनले स्वर्गीय जापानी निचिडात्सु फुजी गुरुले विश्वभरि बनाएका ८० बढी विश्व शान्ति स्तुपले शान्ति फैलाउन तरंगको काम गरिरहेको बताए । निप्पोजान म्याहोजी संस्थाका संस्थापक फुजी गुरुले उक्त स्तुप निर्माण गरेका हुन् ।

कार्यक्रममा शान्ति स्तुपा प्रमुख भिक्षु सातो तात्सुमा र अर्का जापानी भिक्षु योनिसी ओनीसीले पनि बोलेका थिए । सात वर्ष लगाएर निर्माण गरिएको शान्ति स्तुप ४१ दशमलव ५ मिटर अग्लो र २० मिटर गोलाइको रहेको छ । त्यस्तै स्तुपको आधार स्तम्भ ५९ मिटर गोलाइको रहेको छ । ९ सय मेट्रिक टन सिमेन्ट लागेको उक्त स्तुपमा २७ हजार स्क्वायर फुट मार्बल प्रयोग गरिएको छ । स्तुपको गर्भ र गजुरमा भगवान गौतम बुद्धको पवित्र अस्तुधातु प्रतिस्थापन गरिएको छ । ०५० कार्तिक २८ मा गिरिजाप्रसाद कोइरालाले शिलान्यास गरेको स्तुपको ०५८ कार्तिक १८ मा उनैले उद्घाटन गरेका थिए ।

दोस्रो विश्व युद्धमा जापानको हिरोसिमा र नागासाकीमा भएको नरसंहारपछि शान्तिको विकल्प छैन भन्दै जापानी निचिडात्सु फुजी गुरु शान्तिको खोजीमा लागे । यही क्रममा उनी यहाँ आई अग्लो विश्व शान्ति स्तुप निर्माण सुरु गरेका थिए ।