शुक्रबार र शनिबार बिहानैबाट दिउँसोसम्म सफा र चिटिक्कको शुभ्र हिमाल देखिएका थिए । लुम्बिनीस्थित मायादेवी मन्दिर, शान्ति द्वीप, बेबी बुद्ध र यहाँ रहेका शान्तिप्रिय विहार, गुम्बा, चैत्य र गोन्पोसँगै उत्तरतिर देखिएको शुभ्र हिमालले स्थानीय निकै उत्साहित र उमंगित भएका थिए । लुम्बिनीबासीले घरका छत, कौसी र दैलोबाटै मज्जाले सेताम्य हिमाल हेरेका थिए । आँखैअघि हिमाल देखिएपछि स्थानीय, सर्वसाधारण फोटो र सेल्फी खिच्न तँछाड–मछाड गरिरहेका थिए ।

लुम्बिनीबाट विश्वको सातौं अग्लो ८ हजार १ सय ६७ मिटर अग्लो हिमाल धौलागिरि पहिलो देखिएको थियो । त्यस्तै ७ हजार ५ सय ९१ मिटर अग्लो धौलागिरि दोस्रो, ७ हजार १५ मिटर अग्लो धौलागिरि तेस्रो र ७ हजार ६१ मिटर अग्लो धौलागिरि चौथो र ७ हजार १ सय ९३ मिटर अग्लो गुर्जा हिमाल देखिएको थियो ।

त्यस्तै ८ हजार ९१ मिटर अग्लो अन्नपूर्ण पहिलो, ७ हजार २ सय १९ मिटर अग्लो अन्नपूर्ण साउथ र ६ हजार ४ सय ४१ मिटर अग्लो हिउचुली हिमाल देखिएको ट्रेकिङ गाइड टेक घर्तीमगरले बताए ।

हिमालको मनमोहक दृश्यले लुम्बिनी शोभायमान भएको देख्दा निकै खुसी भएको लुम्बिनी बौद्ध विश्वविद्यालयका उपप्राध्यापक भिक्षु सिरी बजिरले बताए । ‘६ वर्षयता बिहान र साँझ सेताम्य हिमालको सुन्दरता र रोमाञ्चकता हेरेर निकै आनन्दित भएँ,’ उनले भने, ‘मन खुसी र चंगा भयो ।’